15.11.2012, 14:24 Пациентите нагрнаа, дел од лекарите штрајкуваат
Болните се жалат дека за одлагање на операцијата дознавале дури кога ќе дошле на шалтер за да им отворат историја на болеста
Лекарите од клиниките кои денеска втор ден штрајкуваа заради платата по учинок почнаа да ги враќаат пациентите откако по прегледот ќе констатираат дека не се итни случаи. Почнуваат и нервозни ситуации меѓу лекарите и пациентите. Посебно што болните се жалат дека за одлагање на операцијата дознавале дури кога ќе стасале на шалтерот да им отворат историја на болеста. Штрајкувачите ваквата неорганизираност ја сметаат како дел од притисокот што го имаат од менаџерите по секоја цена да влезат во операционите сали и да оперираат и редовни пациенти. Да се активираат редовните оперативни листи, како што дознаваме, настојувало и Министерството за здравство, директорите на клиниките како знаат и умеат да ги натераат лекарите да почнат да прават и редовни операции.
Веројатно изјавата на министерот за здравство, Никола Тодоров дека нема штрајк во здравството ги охрабри пациентите, сепак, да дојдат на клиника, иако не се итен случај. Пред амбулантите на клиниките денеска имаше повеќе пациенти за разлика од првиот ден на штрајкот кога болните се броеја на прсти.
Штрајкот продолжува и утре, а Клиничкиот синдикат на министерот му упати порака: „Изјавата дека нема штрајк е затворање на очите пред проблемот. Проблемот со платите нема да исчезне и треба да се преговара“, изјави д-р Снежана Георгиевска од Клиниката за гинекологија.
„Најголеми притисоци има на Рентген институт, каде на две докторки им се заканиле со отказ, потоа на Стоматологија и на Гинекологија каде се инсистирало на скриниг прегледи кои не се итна работа. Во внатрешноста, пак, се кинат плакати, а се барале и списоци на штрајкувачите“, изјави вчера претседателот на Клиничкиот синдикат, Дејан Ставриќ. Тој вели дека штрајкот нема политичка заднина и зад него стојат 1.400 лекари, што е околу 95 отсто од лекарите специјалисти во земјава.
„Секој синдикат има право да штрајкува, не само репрезентативен синдикат. Тоа е уставно право“, изјави Ставриќ, кој тврди дека Клиничкиот синдикат брои околу 6.000 членови, а секој ден членството се зголемува и со тоа ги отфрли обвинувањата на Гранковиот синдикат дека најголемиот број лекари не се во Клиничкиот синдикат.
Министерот за здравство, Никола Тодоров денеска беше во посета на велешката болница во која лекарите не штрајкуваа.
|
