Интервју - Бучковски прв почна да го дели СДСМ

Не го насочи Црвенковски „мечот“ кон неистомислениците, туку некој се обидува брутално и безобѕирно, да ги урива политиките на опозицијата, вели секретарот на СДСМ, Андреј Петров

Александра М. Митевска


По толку време повторно го отворате случајот со Телеком, кој е од времето на Владата на Владо Бучковски. Зошто токму сега?

СДСМ неколку пати претходно го отвораше случајот Телеком, а во парламентот пред неколку години имавме и пратеничко прашање на таа тема. За нас е особено битно овој случај, од времето на владеење на СДСМ да се расчисти, бидејќи борбата против криминалот и корупцијата мора да биде неселективна, а ние сакаме и сега како опозиција, но и како идна власт- јасно да ставиме на знаење дека така ќе биде. СДСМ на тој начин ќе се исчисти од една дамка што ја носи од времето кога бевме на власт. Клучното прашање не е зошто токму сега СДСМ го отвара овој случај, туку зошто власта не постапува по очигледен случај на криминал кој е документиран од страна на американските правосудни органи, во кој се поткупени членови на македонската влада, со скоро пет милиони евра, поради што Дојче телеком плати отштета од 95 милиони евра, признавајќи го стореното дело. Ние поднесовме пријава против непознат сторител, но она што нас не' зачудува е што наместо да реагира обвинителството, се јави ВМРО - ДПМНЕ, а непознатите сторители за нас, за владејачката партија биле познати луѓе со име и презиме. Притоа, нас не' обвинуваат за внатрепартиска пресметка. Не е воопшто битно за граѓаните дали ова е внатрепартиска пресметка или не, туку зошто за докажан криминал во 2005 и 2006 година, каде на членови на македонска влада им е исплатено мито од 4,8 милиони евра, никој не одговара.



Се сомневате ли дека Бучковски стои зад независните кандидатури кои можат да го расипат целиот проект на Црвенковски за обединување на опозицијата?

Независните кандидатури не можат да го расипат проектот на здружена опозиција. Искрено, не знам дали тој стои зад тоа. Но, знам дека агресивната, секојдневна критика врз опозицијата, во ваква ситуација, ќе биде срамен чин, запечатен во биографиите на многу луѓе и тука некој дефинитивно ќе го изгуби образот, а тој нели, не се враќа. Не го насочи Црвенковски „мечот“ кон неистомислениците, туку некој се обидува брутално и безобзирно, крајно егоистично, да ги руши политиките на опозицијата, дискредитирајќи ја нашата макотрпна работа. Од темел ја обновивме партијата. Затекнавме растурен систем, со 18 пратеници во парламентот, со само 6 градоначалници и со освоени- нешто повеќе од 200.000 гласови. Тоа не е вина на новото раководство, туку на синонимите за аздисано владеење на СДСМ, кои денес без трошка срам излегуваат во јавноста, со критики упатени кон нас. За три години речиси ја дуплиравме поддршката кај народот и на локалните избори, според анкетите, имаме реални шанси да освоиме многу градоначалници.

Инаку, кога зборуваме за пресметката со неистомислениците, токму Бучковски прв го прогласи Тито Петковски за предавник во 2005 година и со тоа почнаа поделбите во партијата. Тоа доведе подоцна до серија порази на СДСМ и значеше прекин на интеграциите на земјата во НАТО и ЕУ, но и воведување на национал-романтизмот, како алтернатива.



Бучковски тврди дека сте нервозни и свесен дека Сојуз за иднината не е доволно моќен да им се спротивстави на ВМРО-ДПМНЕ и на Никола Груевски?

Ниту сме нервозни, ниту сме исплашени. Според трендовите, СДСМ ќе ги добие парламентарните избори кога и да се одржат. Пред изборите 2011 година сите анкети и даваа од 2 спрема 1 до 3 спрема 1 предност на владејачката партија, а изборите завршија со резултат 1,19 спрема 1. Тесно победија. И тоа со „иље“. Според проценките, околу 100.000 гласа за власта, не беа резултат на волјата на гласачите, туку на трошењето од државната каса и на притисок. СДСМ, за разлика од нив, водејќи сметка за државата, парите од продажбата на ЕСМ им ги остави во касата и не ги чепна пред изборите во 2006. Тие и нив ги поарчија, а пред секои избори се задолжуваат со нов кредит. При тоа 70.000 опозициски гласови пропаднаа во „бунар“.Мислам на гласовите на партиите од т.н. Пелистер -коалиција, кои сега, заедно со нас, се дел од „Сојузот за иднината“. Сега, кога според најновите анкети на реномирана владина агенција на најмоќната држава во светот, разликата е во рамките на статистичката грешка меѓу двата блока, огромна е шансата на опозицијата да победи, а времето работи за нас, односно против власта. Видете, Бучковски доби се' од СДСМ, беше премиер на државата, претседател на партијата, министер за одбрана, и тој најмалку има право да ја критикува сопствената партија. За жал, најдоследни членови на СДСМ останаа оние кои никогаш ништо не добија, а вложија и се' уште вложуваат многу труд. Заради нив имаме обврска да победиме. И така ќе биде.



Бевте близок соработник со Бучковски, како дојде до толкаво разијдување?

Немам јас разијдување со него, тој се разијде со СДСМ. А мене СДСМ ми значи многу повеќе и од номинално втората позиција во партијата во моментот. Не можам да го прифатам фактот дека сега кога се вклучија да помогнат во оваа политичка битка на Давид и Голијат, и довчерашни наши лути противници, токму тој е дежурниот критичар на опозицијата. Јас не се променив. Истиот сум. Еден од оние кои му помогнаа да стане претседател на СДСМ. Единствениот избран градоначалник на СДСМ во Скопје во 2005 година, кој ја спаси честа на тогаш владејачката партија, победувајќи убедливо на мнозински избори. Го водев неговиот изборен штаб во 2006 година во Првата изборна единица. Според него, во тоа време бев најдобриот претседател на ЗЕЛС. Тој јавно во 2007 година, зборуваше за мене дека сум перспективата на СДСМ. Денес сум му една од дежурните мети во СДСМ. Веројатно, затоа што не сум од оние кои зборуваат во безимена форма јавно, а зад затворена врата фрлаат дрва и камења. Неговото дејствување му нанесува штета на СДСМ, а и овозможува на власта да ја пренасочи дискусијата од економската мизерија во земјата, на критиките кон опозицијата и нејзините политики. Денес ако сакаш да и се допаднеш на власта, критикувај го СДСМ дека нема програма и дека излегол од идеолошката рамка, а раководството дека нема капацитет. Тогаш си "аналитичар".



Зошто Црвенковски не се обиде да го амортизира незадоволството кај поранешните функционери на СДСМ, за да спречи одлевање на гласовите?

Црвенковски и СДСМ го направија невозможното во овој период. Ја обединија целата опозиција во земјата. Подадовме рака за сите. Многу луѓе се вклучија и се вклучуваат во активностите на партијата. Поранешни функционери на партијата, министри, кои се активираа во советите на партијата, во општинските организации, некои дури и во месните одбори. Вратата е отворена за сите и понатаму. Предуслов е да има искрена волја да се помогне, без уцени и калкулации. Секој оној, кој во овој момент ќе се обиде да излезе со независна листа, при тоа крадејќи дел од брендот на СДСМ, а свесен при тоа дека за себе не може ништо да направи и на СДСМ само штета му нанесува, за нас е од другата страна на барикадата, со ВМРО ДПМНЕ. Искрено, почесно ќе биде или да формираат партија и да се испробаат на избори или да го облечат портокаловиот дрес.



Со какви механизми располага СДСМ за да се спротивстави на независните кандидатури кои можат да го раситнат опозициското салдо на изборите?

Доколку се обидат да искористат некој од симболите на СДСМ, кои се заштитени како сопственост, ќе се соочат со сите законски механизми кои ќе бидат искористени од наша страна и сега и во иднина. Зошто само од СДСМ се прави обид за формирање т.н. независни листи? А со кој друг да се занимаваат? СДСМ со Сојузот за иднината е единствениот ривал на ВМРО ДПМНЕ кој што може да ги порази. Тоа е повеќе од јасно.



Во кои општини сметате на сигурна победа на опозицијата на локалните избори?

СДСМ ќе победи во поголем број општини, големи градови, но и рурални средини. Нема место каде нема да се бориме за победа. Нудиме квалитетни луѓе. Голем дел од нив веќе ги претставивме во јавноста. Овој пат направивме сериозни анализи на гласачкото тело и излегуваме со кандидатите многу порано од вообичаено. Нашите противници немаат ниту еден кандидат промовирано, а секојдневно слушаме низа критики за нашите кандидати.