29.11.2012, 16:18 Шамбери ќе плати за Кјељце
Македонскиот првак Металург сака уште во последниот меч во ЛШ годинава да го обезбеди осминафиналето
РОБЕРТ ДИМИТРИЕВСКИ
Македонскиот ракометен првак Металург има намера уште во сабота да го обезбеди пласманот во осминафиналето од Лигата на шампионите со уште една победа над Шамбери во натпреварот од 16 ч. во салата „Борис Трајковски“. По седмиот круг претстојниов викенд настапува двомесечна пауза во најсилното европско клупско натпреварување поради Светското првенство што ќе се одржи во јануари во Шпанија, па во Автокоманда сакаат мирно да ги дочекаат преостанатите три средби од продолжението на ЛШ. Францускиот претставник е идеален за остварување на целта, но и за доизлекување на раните од двата несреќни пораза едноподруго од Кјељце, бидејќи нема освоено ни бод во досегашните шест средби во рамките на групата Ц.
„Дуелот со Шамбери е еден од најважните за нас, бидејќи со победа ќе се пласираме во топ-16. Ако успееме во тоа, ќе продолжиме во победнички ритам и на следните средби, за да обезбедиме што подобар пласман во групата. Никогаш не може да се каже дека натпревар со француски тим е лесен и ја молам публиката за максимална поддршка“, вели тренерот Лино Червар. „Шамбери не игра добро во Лигата на шампионите сезонава, но, сепак, станува збор за многу квалитетен противник. Ги следев нивните натпревари, имаат квалитетни ракометари, кои се стандардни репрезентативци на своите земји, па јасно е дека се екипа што мора да се почитува. Не смееме да помислиме дека ќе биде лесно“.
Капитенот Ванчо Димовски со слично видување.
„Шамбери е втор тим во Франција, па не смееме да се олабавиме, без оглед на фактот дека ги совладавме на гостински терен. Нема да биде лесно, но очекувам да стигнеме до триумф бодрени од публиката“, вели кружниот напаѓач на „металурзите“ и на македонската репрезентација. „Немаме победа во последните две кола, но тоа е само мотив повеќе за да се вратиме во посакуваниот ритам, по кој бевме препознатливи во првите четири средби од ЛШ сезонава“.
Повредениот Миладин Козлина тешко дека ќе настапи и на овој меч, откако ги пропушти реваншот со Кјељце и потоа мечот со Татран во СЕХА-лигата.
|
