30.11.2012, 13:23 За три години државата ќе изгради 1.700 станови
Државата ќе изгради вкупно 1.724 комерцијални станови до 2015 година, ја соопшти денеска владиниот портпарол Александар Ѓорѓиев одлуката на Владата донесена на последната седница. Интензивната станбена изградба што ќе ја спроведува АД за стопанисување со станбени деловен простор треба да ја зголеми понудата на станови кои ќе имаат за околу 20 проценти пониска цена од пазарната, а тоа би требало да придонесе за намалување на цената на станбениот квадрат на територијата на цела Македонија.
Изградбата на сите овие станови ќе чини околу 80 милиони евра, што значи дека вредноста на квадратот за стан со просечна голе��ина од 50-ина квадратни метри би била меѓу 800 и 900 евра. Средствата за изградба ќе бидат обезбедени од сопствени извори на Акционерското друштво со реинвестирање, односно, новите станови ќе се градат со пари од продажбата на веќе изградените станови, што, според Ѓорѓиев го прави проектот економичен и исплатлив.
„Анализите покажаа дека најскап станбен квадрат има во Скопје, па затоа и најголем дел од становите и првите две фази од проектот ќе бидат изградени во главниот град. Очекуваме намалувањето на цената на становите во Скопје да повлече натамошно поевтинување на квадратот во внатрешноста, каде што притисокот објективно е помал“, рече Ѓорѓиев.
Од вкупниот број станови што треба да се изградат во наредните три години, во фаза на градба се 527 станови во 9 згради во Скопје. Една зграда е кај „Радиобран“ на булеварот „Митрополит Теодосиј Гологанов“, а другите 8 се во населбата Лисиче и нивната изградба е во завршна фаза. Останатите станови треба да бидат предадени во 2013 година и за дел од нив во текот на идната недела ќе има лицитација. (Б.А.)
|
