Бугарија и постави три услови на Македонија

Во писмо до македонскиот колега Попоски, шефот на бугарската дипломатија Младенов набројува што треба Скопје да стори за да добие поддршка од Софија

Шефот на бугарската дипломатија, Николај Млaденов, во писмо упатено до македонскиот министер за надворешни работи, Никола Попоски, предлага три чекори за нормализација на односите меѓу двете земји, како услов Бугарија да ја поддржи македонската интеграција во ЕУ.

Првиот услов што го предлага Младенов е да се потпише спог��дба за добрососедски односи и соработка, која ќе биде според највисоките европски стандарди и ќе се базира на Декларација што ја склучија во 1999 година двете земји.

Вториот чекор би бил изградба на неопходна инфраструктура за засилена соработка, како и создавање заеднички работни групи за подобрување на односите во клучните области. Како трето, Софија предлага формирање совет на високо ниво во форма на годишни меѓувладини средби. „Ако се гарантира исполнувањето на предлозите, тоа ќе ја осигура поддршката од Бугарија за интеграцијата на Република Македонија во ЕУ“, наведува Младенов во писмото.

Тој посочува дека Бугарија од осамостојувањето на Македонија ги поддржува нејзините напори за евроатлантска интеграција, но оти во последните години билатералните односи не се на ниво соодветно за две толку блиски и заемно поврзани земји. Младенов искажува незадоволство од „антибугарските дејства и реторика во Македонија“, кои, како што наведува, „имаат цел да го нагласат тоа што ги разделува, а не што ги обединува двете земји“. (Н.Р.)