01.12.2012, 11:50 Преку Шамбери до осминафинале
Металург попладнево става печат врз пласманот во топ-16
Каква било победа попладнево над отпишаниот Шамбери на ракометарите на Металург им гарантира пласман во осминафиналето на Лигата на шампионите. Но, македонскиот првак сака да го стори тоа со стил, како што и ја почна кампањата во ЛШ токму кај францускиот вицешампион, кога го совлада со 33:30. „Металурзите“ ветуваат дека нема да зажалат тие што ќе дојдат денеска од 16 часот во салата „Борис Трајковски“ за да ги бодрат во мечот од седмиот круг во групата Ц.
„Ова е најважниот натпревар за нас, бидејќи со победа ќе го оствариме првиот зацртан приоритет за оваа сезона - пласманот во следната фаза од Лигата на шампионите. Шамбери е втора екипа во Франција, а знаеме што значат Французите во ракометот. Во ЛШ сезонава не играат добро, но во Скопје доаѓаат засилени со левиот бек Дамир Бичаниќ, кој не играше на првиот меч. На последните натпревари не играше десниот бек Ниока, а нема да го имаат ни пикерот Бертран Жил. Но, никој не може да каже дека ќе биде лесно со тим што ги има во своите редови Детре, Бичаниќ, Башиќ“, предупредува тренерот Лино Червар.
Левиот бек Миладин Козлина е повреден и хрватскиот стратег на клупата на Металург се сомнева дека Словенецот ќе може да игра во реваншот со Шамбери, кој нема освоено ни бод досега. До почетокот на мечот за испразнетото место ќе конкурираат Милан Левов и Митко Стоилов.
Червар очекува противникот да игра зона 5-1 во одбраната, наспроти досегашната 6-0. Во однос на првата средба ќе има промени и во одбранбениот бедем пред Дарко Станиќ, со оглед на очекуваното отсуство на Козлина, кој е важен „шраф“ во дефанзивата на тимот од Автокоманда.
Натпреварот Металург - Шамбери ќе го судат Унгарците Чаба и Пал Кекеш. Во рамките на групата, вечерва Санкт Петербург ќе го пречека Горење, а утре попладне Силкеборг ќе му биде домаќин на лидерот Кјељце, кој има максимални 12 бода, четири повеќе од Горење и од Металург.
Шундовски и Ангеловски со победа
Македонскиот селектор Звонко Шундовски и репрезентативецот Бранислав Ангеловски ја прославија втората победа во Лигата на шампионите сезонава, со која Констанца се врати во игра за пласманот во осминафиналето. Романскиот првак го совлада Савехоф со 28:23 во Букурешт, Ангеловски, како и во претходното коло против Атлетико во Мадрид, постигна пет гола, со кои беше втор стрелец во својот тим.
Чеховски медведи и Хамбург обезбедија осминафинале, Русите со победата од 31:27 над Партизан во Белград, а Германците славејќи дома со 32:26 против Реале Адемар Леон.
|
