Поплавата во Боговиње му ги расипа плановите на Вардар

Новиот термин на одигрување на дуелот помеѓу Дрита и Вардар сигурно нема да биде презакажан во рок од 24 часа бидејќи е нереално теренот да биде оспособен за толку кратко време

На Вардар сепак не му се исполни желбата преку Дрита уште во 17. коло да ја осигура есенската шампионска титула. И покрај тоа што двата тима истрчаа на теренот, сепак поради невозможните услови да се одигра на преплавениот стадион во Боговиње мечот беше одложен.

Новиот термин на одигрување на дуелот помеѓу Дрита и Вардар сигурно нема да биде презакажан во рок од 24 часа бидејќи е нереално теренот да биде оспособен за толку кратко време.

Хоризонт Здравје не успеа да дојде до триумф на гостувањето кај Брегалница и да ја врати лидерската позиција на табелата и покрај тоа што прв го отвори мечот. Во 33. минута Милушев погоди за водство на турновци 1:0, но десет минути подоцна домашниот фудбалер Трајчев израмни на 1:1.

Доста интересен меч се одигра и во Тетово. Шкендија се спаси од пораз на домашен терен, во 79. минута Ејупи негативата од 2:1 на дуелот со Напредок ја претвори во реми 2:2.

Градското дерби меѓу Металург и Работнички го доби домаќинот откако уште во првото полувреме со головите на Аломеровиќ и Крстев поведе со 2:0. „Романтичарите“ преку Велковски во 88. минута намалија на 2:1, но немаа доволно сили за да извлечат нерешен резултат. (М.К.)

Резултати од 17. коло: Металург - Работнички 2:1, Дрита - Вардар одложен, Шкендија - Напредок 2:2, Пелистер - Тетекс 2:1, Брегалница - Хоризонт 1:1, Силекс - Ренова 1:0.

ТАБЕЛА

1. Вардар 16 9 5 2 30:9 32

2. Хоризонт 17 8 8 1 21:12 32

3. Напредок 17 9 3 5 21:16 30

4. Металург 17 9 3 5 20:14 30

5. Шкендија 17 8 5 4 30:21 29

6. Брегалница 17 8 2 7 19:14 24

7. Дрита 16 6 5 6 18:22 23

8. Ренова 17 6 2 9 16:26 20

9. Работнички 17 5 3 9 21:28 18

10. Пелистер 17 5 3 9 15:21 18

11. Силекс 17 4 3 10 14:24 15

12. Тетекс 17 2 3 12 9:27 9

Идно коло (9 декември, 13 ч.): Напредок - Металург, Работнички - Брегалница, Ренова - Пелистер, Тетекс - Шкендија, Турново - Дрита, Вардар - Силкес.