Француски клуч за „невозможната мисија“

Надежта за сензација се темели на победата над светскиот вицешампион од 30:27 во мартовскиот квалификациски дуел во Скопје

Од нашиот известувач

РОБЕРТ ДИМИТРИЕВСКИ

НИШ - Никој повеќе од најдобрите македонски ракометарки не е свесен колку висока планина треба да искачат уште на стартот од 10. Европско првенство во Србија, каде што вечерва од 18,15 ч. во Спортскиот центар „Чаир“ во Ниш ги чека Франција. Според многумина, светскиот вицешампион е фаворит во групата Б, во која се и европскиот вицепрвак Шведска и освојувачот на три европски злата Данска, но никој подобро од избраничките на селекторот Гино Стрезовски не знае дека Французинките не се бауч. Во тоа се уверија во март годинава, кога во „Кале“ ги совладаа со 30:27, со што го направија клучниот исчекор на патот кон јубилејното ЕП, петто за Македонија.

„Начевски тврди дека ќе ја победиме Франција, а тој е како баба Ванѓа“, вели Стрезовски, потсетувајќи на оствареното предвидување на генералниот секретар на Ракометната федерација на Македонија и пред споменатиот меч со „триколорите“. „Поголеми ни се шансите против Шведска и Данска, но зошто да не се надеваме на успех против Франција? Ако можевме во Скопје... Не правиме калкулации и нема да се чуваме против Французинките, бидејќи секој натпревар е шанса за освојување бод или два, а ние ќе имаме три такви можности во Ниш“.

На тој дуел со „триколорите“ што ги подгрева надежите на „црвено-жолтите“ за добро отворање на еврошампионатот Јулија Николиќ беше најефикасна со девет гола, Драгана Пецевска постигна еден помалку, а по четири пати во листата на стрелците се запишаа Робертина Мечевска и Мирјета Бајрамоска.

„Тогаш покажавме тимски дух и цврстина. Така треба да играме и во Ниш“, вели Бајрамоска. „Во моментов мислам дека немаме шанса против Франција. Тие ќе ни пристапат сериозно, бидејќи еднаш веќе имаат изгубено од нас и тоа ќе биде тешко да се повтори“.

Дека Франција сериозно гледа на својот прв соперник на турнирот потврдува и селекторот Оливие Крумболц.

„Франција мора да биде многу внимателна со Македонија. Не знаеме многу за нив, но Јулија Николиќ е извонреден играч и загубивме од нив во квалификациите за ЕП. Тие ќе бидат навистина мотивирани за да не' победат на стартот од натпреварувањето“, предупредува првиот човек на француската клупа, на која седи од 1998 година и со кој се врзани најголемите успеси на „галските петли“. Водена од најдобриот тренер за 2010 година според ИХФ, Франција има поголеми достигнувања на мундијалите (злато во 2003 година и сребро во 1999, во 2009 и во 2011) отколку на европските првенства (бронза во 2002 и во 2006 година). На последното ЕП 2010 во ��анска и во Норвешка беше петта, пласман што го оствари и на годинашните Олимписки игри во Лондон.

Најважни алки во францускиот синџир се Алисон Пино, Сираба Дембеле и Нина Канто. Бекот Пино беше прогласена за најдобра светска ракометарка во 2009 година и, покрај напаѓачките квалитети, со своите 181 см е незаменлива и во одбраната. За левото крило Дембеле ова е четврто ЕП од 2006 година наваму, има 469 гола на 150 меча и сезонава првпат игра во странство, откако летоска потпиша за Рандерс од Данска. Со повеќе од 160 репрезентативни настапи, 29-годишната Канто е една од најискусните во тимот селектиран од Крумболц, годинава избрана за најдобар дефанзивец во француската лига.

Скандинавската пресметка меѓу Шведска и Данска од 20,15 ч. е дерби на денешното прво коло во групата Б. Швеѓанките се наредниот противник на Македонките задутре од 18,15 ч., а дуелот со Данките е в сабота од 20,15 ч. Трите првопласирани селекции продолжуваат за Белград, каде што ќе оформат група од вториот круг во која ќе ги одмерат силите со трите најдобри од прелиминарната група А, во која се бранителот на титулата Норвешка, потоа Украина, домаќинот Србија и Чешка. Натпреварот Украина – Чешка денеска од 17,45 ч. и официјално ќе го отвори натпреварувачкиот дел на шампионатот.

АНДРЕЕВА ПРЕД „КЛУБ СТО“

Капитенот Тања Андреева на натпреварот со Данска в сабота треба да го одигра својот стоти натпревар за македонската репрезентација, за која има постигнато и два гола. Со своите 34 години, чуварот на мрежата е најискусна во составот од 16 ракометарки што ќе ги бранат боите на Македонија на ЕП во Србија.

Голмани: Тања Андреева (Металург), Дијана Наумоска (Жито Прилеп) и Наташа Антиќ (Металург).

Крила: Симона Гроздановска (Металург), Марија Папуџиева (Бодрум Каликарнас, Турција), Драгана Пецевска (Металург) и Драгица Митрова (Металург).

Бекови: Мирјета Бајрамоска (Металург), Душица Ѓорѓиевска (Металург), Савица Мркиќ (Жито Прилеп), Зорица Десподовска (Металург), Марија Штериова (Вардар СЦБТ), Билјана Црвенкоска (Вардар СЦБТ), Ивана Саздовски (Вардар СЦБТ), Јулија Николиќ (Звезда Звенигород, Русија).

Кружни напаѓачи: Робертина Мечевска (Металург), Наташа Младеновска (Металург).

ЈУРАК НЕ ЈА ОТПИШУВА МАКЕДОНИЈА

„Македонија е типична моќна балканска репрезентација, полна со борбен дух. Нема ниту една голема ѕвезда, но тимот е добро избалансиран, а поддршката од навивачите ќе му даде крилја. Но, според мое мислење, тие не можат да се пласираат пред Франција, но можеби пред Шведска или Данска“, смета германската ракометна легенда Грит Јурак, сега во својство на експерт на ЕХФ за Лигата на шампионите и за европските првенства.

Според 34-годишната учесничка на шест ЕП меѓу 1994 и 2010 година, која ја водеше Германија до четвртото место во Шведска 2006 и во Македонија 2008, во групата Б секој може да победи секого.

„Не знаете кој тим на крајот ќе заврши прв, а кој последен. Сите од нив можат да одиграат совршен турнир, но сите овие тимови можат и да паднат многу рано“, вели левораката бомбардерка што постојаната повреда на рамото ја принуди во октомври да ја заврши кариерата, во која одигра 306 натпревари за Германија и постигна 1.581 гол. „Франција е мојот личен фаворит во оваа група и таа е совршен пример да се биде меѓу светската класа и дното. Данска има подмладен состав и не знаете како, а тоа важи и за Швеѓанките, ќе се соочат со фактот дека Македонија ќе ја има поддршката на стотици апсолутно френетични и бучни навивачи и дали ќе можат да ги задржат своите нерви под контрола“.

НОРВЕЖАНКИТЕ НАЈУСПЕШНИ

Норвешка е убедливо најуспешната нација со пет златни медали, два сребрени и еден бронзен на досегашните девет европски првенства. Следува Данска со три злата и две сребра, а со европска титула се има закитено само уште Унгарија, која има и две бронзи. Русија има освоено едно сребро и две бронзи, Шведска, Шпанија, Украина и Германија по едно сребро, Франција две бронзи и Романија и Австрија по една.

ШАМПИОНОТ ПОЧНУВА СО ДОМАЌИНОТ

Група А, Белград, денеска: Украина – Чешка (17,45 ч.), Норвешка – Србија (20,15 ч.).

Група Б, Ниш, денеска: Франција – Македонија (18,15 ч.), Шведска – Данска (20,15 ч.).

Група Ц, Нови Сад, денеска: Германија – Шпанија (18,15 ч.), Хрватска – Унгарија (20,15 ч.).

Група Д, Вршац, денеска: Црна Гора – Исланд (18,05 ч.), Романија – Русија (20,15 ч.).