(ФОТО) Ракометарките декласирани од Франција



Македонија загуби со 29:16 на стартот на ЕП, откако даде само шест гола во вториот дел, кога првпат погоди дури во 45. минута

Од нашиот известувач
РОБЕРТ ДИМИТРИЕВСКИ

ФОТО: Денис Дуковски

НИШ - Женската ракометна репрезентација на Македонија го почна јубилејното 10. Европско првенство во Србија со катастрофален пораз од 29:16 против Франција во рамките на групата Б во Ниш. Светскиот вицешампион и еден од главните претенденти за европската круна ја оправда улогата на апсолутен фаворит, во што му помогнаа и Македонките со неверојатната серија промашувања во второто полувреме, кога постигнаа само шест гола. Нивниот пост се одолжи дури до 45. минута, кога Ивана Саздовски конечно го најде патот до француската мрежа. Но, негативата веќе беше двоцифрена (21:11), а со тоа и можноста за враќање во игра нереална. Кој знае колкава ќе беше разликата ако до крајот на мечот голманката Дијана Наумоска не "симна" повеќе "зицери" на вториот состав на противникот, завршувајќи ја средбата со 12 одбрани.

Мирјета Бајрамоска го реализира првиот напад и и' донесе почетно водство на Македонија, но Французинките возвратија со три гола во низа и не го испуштија водството до крајот на полувремето. Со првиот гол на Јулија Николиќ црвено-жолтите намалија на 5:4 во 10. минута, но следуваше серија на противникот од четири погодоци и, за во 23. минута разликата да достигне максимални 13:7. Тогаш "триколорите" се олабавија и му дозволија на ривалот да намали на 14:10 пред Паула Бодуен од седмерец да го постави резултатот со кој се замина на одморот.

Статистиката од натпреварот најдобро ја отсликува разликата во класи меѓу двете селекции во моментов. Македонија потроши 57 напади за да постигне 16 гола наспроти ефектот 29/55 на Франција. Притоа, македонските ракометарки имаа 22 загубени топки, осум повеќе од француските.

Избраничките на селекторот Гино Стрезовски ја имаа поддршката од околу 150 македонски навивачи на трибините во СЦ "Чаир", кои, освен, единственото водство на самиот почеток на средбата, немаа што да слават.

СТРЕЗОВСКИ: МНОГУ ЛОШ МЕЧ

Гино Стрезовски: "Многу, многу, многу лош меч. Во првото полувреме можеби имавме добра одбрана, но во вториот дел примивме премногу голови од противнапади. Ни претстои тежок натпревар со Шведска, против која сметам дека имаме шанси. Имаме два дена за подготовка и очекувам да бидеме подобри од денеска".

Јулија Николиќ: "Многу тежок натпревар. Се трудевме, игравме борбено до крај, но Франција има извонредна одбрана и беше тешко да се пробие. Се надедвам дека на следниот меч ќе дадеме максимум и оти ќе направиме добар резултат".

Оливие Крумболц: "Многу сум среќен што победивме, посебно поради тоа што одигравме многу добар меч, а и и' вративме на Македонија за поразот во квалификациите. Имавме добра одбрана и голмани, што ни овозможи многу лесни голови од контранапади. Задоволен сум и од гол-разликата, која би можела да биде важна за пласманот во наредната фаза во случај да се создаде круг на репрезентации со ист број бодови".

Камил Ајглон: "Среќна сум што го отворивме првенството на ваков начин. Ја респектираме Македонија, која има неколку добри ракометарки, а посебно обрнавме внимание на Николиќ и на Бајрамоска, кои одиграа фантастично во претходниот меѓусебен дуел што го загубивме".

Франција - Македонија 29:16

Полувреме: 15:10. Сала: СЦ "Чаир" во Ниш. Гледачи: 500. Судии: Хорват и Мартон од Унгарија. Седмерци: Франција 5/6, Македонија 3/4. Исклучувања: Франција 4 мин., Македонија 4 мин. Загубени топки: Франција 14, Македонија 22.

Франција: Прадел (10+1 одбрани), Дарле (8 одбрани), Дансет 0/1, Камто 1/2, Ајглон 2/3, Пино 2/3, Менди 4/7, Бодуен 8/9 (5/6), Гнабују 1/5, Брино 1/2, Дембеле 5/5, Гојорани 2/2, Тервел, Пјежос 0/1, Сињат 0/3, Лакрабер 3/3. Селектор: Оливие Крумболц.

Македонија: Андреева (1 одбрана), Наумоска (11+1 одбрани), Мечевска 2/2, Саздовски 3/7, Мркиќ, Гроздановска 0/1, Младеновска 1/2, Д. Ѓорѓиевска, Бајрамоска 1/8, Николиќ 6/15 (2/3), Црвенкоска 2/3 (1/1), Пецевска 1/3, Папуџиева, Десподовска, Митрова 0/2, Штериова 0/2. Селектор: Гино Стрезовски.