04.12.2012, 12:30 Ниш ни бледа сенка од јануари
Македонските фанови, кои на машкото ЕП го обоија градот во црвено и жолто, во најголем број се очекуваат против Данска в сабота
НИШ – Правењето паралели меѓу јануарското Европско првенство за ракометари во Србија и декемврискиот еврошампионат за ракометарки е како мешање баби и жаби, барем во однос на Македонија. Му доаѓа нешто како правење споредба меѓу прекрасно поминат летен одмор на море и враќање на истото место во зима. Навистина, и двете големи ракометни натпреварувања од средината на 1990-тите се одржуваат исклучиво во зима, но разликата е „драстична“, што би рекол Ѓуро од „Топ-листа на надреалисти“.
Ниш овие денови ни оддалеку не потсетува на „главниот град“ на јужна Србија од времето на походот на македонските навивачки „орди“ од почетокот на годинава. Ни „е“ од еуфоријата што владееше за време на вдахновениот залет на најдобрите македонски ракометари до историското петто место на стариот континент. Тогаш немаше кафуле или дискотека во близина на Спортскиот центар „Чаир“ што не беа украсени со македонски знамиња и каде што немаше врвулица од расположени љубители на овој спорт во Македонија.
За вечерашното отворање на натпреварите во групата Б со мечот меѓу Македонија и светскиот вицешампион Франција од локалниот организациски одбор очекуваат најмногу 2.000 гледачи, иако од Ракометниот сојуз на Србија тврдат дека до денеска се продадени 70 проценти од влезниците за Ниш. За илустрација, за стартниот дуел меѓу Македонија и Шведска на машкото ЕП салата беше исполнета речиси 99 отсто со македонски навивачи и пред мечот се бараше билет повеќе.
Генералниот секретар на Ракометната федерација на Македонија, Марјан Начевски, неспоредливо помалиот интерес кај Македонците за ова ЕП го објаснува со неколку фактори.
„Натпреварот со Швеѓаните во јануари се играше в недела, а сега со Французинките во вторник, значи во работен ден, и тоа во попладневниот термин. Тоа, објективно, влијае врз посетеноста, но клучни се резултатите. Ремито со Шведска во јануари, кога имавме и напад за победа во финишот, дополнително ја подгреа атмосферата во Македонија, па за следните два меча со Германија и со Чешка салата повторно беше полна со наши навивачи. Ако и девојките заиграат во таков стил, ќе видите што ќе се случува во Ниш“, вели Начевски.
Во македонската ракометна јавност преовладува мислењето дека клучен дуел за пласманот во вториот круг во Белград, каде што ќе продолжат трите најдобри селекции од Ниш, ќе биде тој со подмладената Данска в сабота од 20,15 ч. Токму за тој меч се очекува и најголем број црвено-жолти знамиња на трибините. Ракометарките најавија дека шансата ќе ја бараат и задутре од 18,15 ч. против европскиот вицешампион Шведска, која на Олимписките игри во Лондон летоска ги изгуби сите пет средби.
Кога сме кај Швеѓанките, Македонија доби подобро сместување од нив во Ниш. Исто како ракометарите, и ракометарките се сместени во хотелот „Тами резиденс“, но вторите им го отстапија депандансот на Скандинавките.
„Бев во хотелот во јануари и забележав дека репрезентативците мораа добро да се наоблечат за секое излегување до главниот објект за појадок, ручек и вечера. Со оглед на тоа дека од Ракометната федерација на Шведска не дојдоа на работниот состанок кога се договараше сместувањето, домаќинот нас не' смести во хотелот, а ним им го додели депандансот“, ни објасни Гордана Нацева-Бошева, директор на женската ракометна репрезентација на Македонија.
Дека во Ниш ништо не е исто како во јануари се погрижи да докаже и времето. Обилните врнежи од снег ден пред првенството ги замени сонце и повисока температура пред натпреварот со Франција наредниот ден.
„Времето ти е како женскиот карактер – променливо и непредвидливо. Никогаш не знаеш кога ќе те смрзне, а кога ќе те огрее сонце“, ќе прокоментира еден од колегите, со јасна алузија на очекувањата од најдобрите македонски ракометарки на јубилејното 10. Европско првенство во Србија. (Р.Д.)
|
