Челзи и понатаму очаен!

„Сините“ со убедлив пораз се вратија од гостувањето кај Вест Хем (3:1), за домаќинот ова е прва победа над европскиот шампион од 2003 година

Новиот стратег Рафа Бенитез повторно не успеа да донесе ништо ново во играта на „сините“. Ниту во својот трет обид откако е на „кормилото“ на европскиот шампион не успеа да дојде до победа. Новата шлаканица дојде во градското дерби со Вест Хем, по добро прво полувреме и водство, Челзи во продолжение целосно падна и му дозволи на домаќинот да направи целосен пресврт за голем триумф од 3:1.

Челзи добро го отвори мечот, наградата за ваквата игра стигна уште во 10. минута, првиот гол во ерата на Бенитез го постигна Хуан Мате за 1:0.

Гостинскиот тим не застана, продолжи да демонстрира убав фудбал, но Мата, Азар и Торес одличните шансите не успеаја да ги претворат во втор гол. Во овој дел Вест Хем воопшто не беше закана по голот на Чех, слободно може да се каже дека „сините“ доминираа во првото полувреме.

Но, во вториот дел сликата на теренот во целосно се промени. Домаќинот го притисна тимот на Бенитез и во 63. минута преку Картлон израмни на 1:1.

И покрај првиот гол на Вест Хем никој не претпоставуваше дека практично ова беше најава за целосен пресврт. Во 83. минута Дијаме зголеми на 2:1, а четири минути подоцна Маига ги постави конечните 3:1.

За Челзи ова е седмиот меч без победа, со што дојде до најлошата серија во последните 18 сезони.

„Во првото полувреме постигнавме само еден гол, а требаше да дадеме барем уште два или три. Натпреварот моравме да го решиме во првите 45 минути кога бевме далеку подобри и потполно доминантни. Подоцна кога го примивме првиот гол, се' беше поинаку. Во продолжение игравме се' послабо, брзо ги губевме топките, не успеавме да го најдеме вистинскиот начин за да ги сопреме и се' тргна надолу. Но, добро, ова се уште нашите почетоци, по моето доаѓање се' уште сме во процес на градење на тимот“, изјави по мечот Бенитез.

Потопот на фаворитите во 15. коло од Премиер-лигата го продолжија Манчестер Сити и Арсенал. „Граѓаните“ на свој терен одиграа 1:1 со Евертон, а додека „топџиите“ од гостувањето кај Свонси се вратија со пораз од 2:0.

Резултати 15. коло: Вест Хем - Челзи 3:1, Арсенал - Свонси 0:2, Фулам - Тотенхем 0:3, Ливерпул - Саутемптон 1:0, Манчестер Сити - Евертон 1:1, КПР - Астон Вила 1:1, ВБА - Стоук 0:1.