03.12.2012, 15:33 АЕК: Најмногу неосновано одбиени приговори од „Близу“
Најмногу неосновано одбиени приговори на граѓаните кои се пожалиле на услуга од операторите на пазарот на електронски комуникации, a кај кои АЕК делувал корективено, има од „Близу“, а најмалку од ВИП оператор.
Тоа го покажала анализата на Агенцијата за електронски комуникации (АЕК) изготвена на примерок од 100.000 претплатници за првите три квартали од годинава, презентирана на денешниот јавен состанок на регулаторното тело.
Од приговорите што во тој период се анализирани на база на 100.000 активни претплатници, кај кои АЕК проценила дека се отфрлени неосновано, 111,7 се од „Близу“. По нив следат ОНЕ со 95,2 приговори, „Македонски Телеком“ со 40,7, „Т-Мобиле Македонија“ - со 3,13 и ВИП со 1,89 приговори.
Покрај за грижата на операторите до крајните корисници на јавниот состанок на АЕК се дебатираше за развојот на пазарот на електронски комуникации и досегашните искуства, со сугестии за корекција на недостатоците кај некои од чинителите на пазарот.
- Целта на организирање на овие јавни состаноци е АЕК заедно со операторите, преку анализа на состојбите и преку продуктивни дебати, да се воочат грешките и да се подобри пристапот на операторите кон крајните корисници. Идејата на АЕК е секогаш да делува превентивно на операторите со намера тие да ја подобрат грижата кон крајните корисници, изјави директорот на АЕК, Роберт Орданоски. лв/паг/15:25
|
