Клуч на врата за „Повардарие“?

Државата ќе запленува имот, а сопствениците најавуваат затворање на винарницата

Ангел Данов

НЕГОТИНО- Недоразбирањата меѓу државата и втората најголема винарница во земјава ги натера сопствениците на „Повардарие“ од Неготино да размислуваат за затворање на компанијата. Сопствениците од Србија биле незадоволни од непочитувањето на судските одлуки во Македонија. За утре има најави дека фирмата ќе биде окупирана од извршители за присилна наплата на даночни обврски, иако постоело решение од Управен суд со кое привремено се одлага извршувањето, се' до завршување на судскиот спор меѓу државата и винарската визба.

„Не знаеме каде да бараме заштита. Одлуката за повлекување од Македонија, доколку не се надминат овие проблеми, не е лично моја, туку на Управниот одбор. Судот донесе правосилно решение со кое се одлага извршувањето на решението за присилна наплата донесено од Царинската управа и тоа важи до завршување на управниот спор“, нагласува директорот на „Повардарие“ Ванчо Кузманов.

Царинската управа пред околу повеќе од еден месец и' ја одзеде акцизната дозвола на визбата и ги затвори акцизните складишта поради даночни обврски од 40 милиони денари.

Директорот на „Повардарие“ објаснува дека по барање на Царинската управа, а според Законот за данок, воспоставиле и хипотека од прв ред во корист на Царината се' до конечно решавање на спорот, па затоа и одлуката за извршување ја прелеала чашата. Кузманов вели дека ако дојде до извршување, ќе се соочат со големи проблеми во тековното работење и дека ќе им биде попречено вршењето на редовната дејност, но дека сепак овие состојби нема да се одразат на исплатата на откупеното грозје.

Кузманов вели дека не е во ред да се продлабочува проблемот, бидејќи винарницата неколку години по ред ја спасува кризата која настанува за време на откупот на винско грозје и секогаш се откупувале поголеми количини, само да им се излезе во пресрет на лозарите.