Се укинуваат и намалуваат царини од 2013

Фискалните импликации од оваа мерка изнесуваат околу 30 милиони денари и тие се веќе антиципирани во проекциите за буџетот за 2013

Вицепремиерот и министер за финансии Зоран Ставрески денеска објави дека од 1 јануари следната година Владата ги укинува или намалува царинските стапки за репроматеријали за резервни автомобилски делови, полиетиленски фолии, алатни машини, железнички товарни вагони и автобуси, како директна поддршка на пет стопански гранки. Фискалните импликации од намалувањата на царините изнесуваат околу 30 милиони денари на годишно ниво и тие се веќе антиципирани во проекциите за буџетот за наредната година, најавија денеска Ставрески и првиот цариник Ванчо Каргов.

„Укинувањето на царинските стапки за тие стоки е во функција на подобрување на условите за стопанисување на домашните производители, развој на индустријата со цел поголем извоз на странските пазари“, информираше Ставрески.

Според него, со оглед дека на тоа што во Македонија работат индустриски капацитети кои што произведуваат автомобилски делови, како поддоговарачи на големите автомобилски компании и кои се извозно ориентирани, се укинува стапката од 15 проценти за облоги и плочки за кочници, фрикциони производи и други делови од нетемперирано леано железо. Во металопеработувачката индустрија за над 105 производи, пред се алатни машини, се намалуават стапките кои досега изнесуваа 5 проценти и повеќе. Ставрески потенцира дека со ова директно ќе им се помогне на компаниите што се занимаваат со производство на предмети од метали и на целокупната металопреработувачка индустрија, но и на малите бизниси кои во голем дел се занимаваат со произвдоство на предмети од метали.

Ќе има намалување на царините и за транспортниот сектор со цел обнова на возниот парк и намалување на трошоците на транспортните компании. Се намалуваат царините за автобусите и минибусите од прва категорија од 10 проценти на 5 проценти, додека царините за автобусите и минибусите од втора категорија се намалуваат од 15 на 5 проценти. Царините за вагоните и цистерните пак, кои досега изнесуваа 4 проценти, сега се укинуваат. За Ставрески тоа ќе значи директна поддршка за компаниите од транспортниот сектор во патниот и железничкиот сообраќај.

Се интервенира и кај царинските стапки за фолии од полиетилен, што делумно се употребуваат во прехранбената индустрија и во графичката индустрија кај копир апаратите, каде што се укинува целосно стапката што досега изнесуваше 6 проценти.

„На овој начин преку значително намалување и укинување на царинските стапки Владата директно ќе им помогне на пет-шест сектори што се значајни за македонската индустрија и кои што во вакви околности кога се соочуваат со предизвиците на европската и светската економска криза и очекуваат поддршка од Владата“ нагласи Ставрески.

Тој додаде дека намалувањата на царинските стапки се мерки на Владата донесени во соработка со бизнис заедницата и нејзините потреби.

��Ќе продолжиме и понатаму да согледуваме кои се местата во оваа област за да се продолжи со намалување и елиминирање на царинските стапки, пред се за зголемување на конкурентноста на нашето стопанство и истовремено да не се оштети некој друг сектор што веќе постои во македонија“, потенцира директорот на Царинската Управа Ванчо Каргов. (Ек.Р.)