28.11.2012, 13:22 Џорџ Хил го засени Коби
Лејкерси поразени од Индијана со 79:77 и покрај 40. поени на Брајант, откако гостинскиот бек положи во последната секунда за победа на гостите
Кошаркарите на Лос Анџелес Лејкерс во „Стејпл центарот“ доживеаја вистински шок откако во последната секунда го загубија мечот со Индијана (79:77). Јунакот кај гостите беше Џорџ Хил, ги постигна победнички поени и во сенка ја стави брилијатната игра на Коби Брајант зачинета од 40 поени и десет скока, но и исто толку загубени топки.
Откако Брајант со елегантна тројка навидум осигура продолжение, на другата страна се случи неочекуваното. Лејкерси не се одлучија на брз фаул и за тоа беа казнети, Хил со положување преку раката на Паул Гасол донесе големо славје во редовите на Пејсерси.
Победникот го предводеше токму плејмејкерот на Индијана, средбата ја заврш со 19 поени, добро го пратеше Дејвид Вест со 16 поени и десет скока.
Покрај Коби до двоцифрен број на поени дојде трагичарот Двајт Хауард (17 поени), кој на 55 секунди до крајот при водство на гостинскиот тим 75:74 двапати беше непрецизен од линијата за слободни фрлања.
„Нашата одбрана не им дозволи да одиграат во препознатливиот стил, забивања и слично на тоа. Имавме неколку дена за подготовка, мислам дека тимската игра придонесе да го издржиме целиот притисок“, изјави по мечот Дејвид Вест.
За тимот од Лос Анџелес Лејкерс новиот пораз значеше враќање на негативниот скор (7 победи и 8 порази). Избраниците на Мајк Дантони во последните четири средби забележаа три порази, што пак повторно ги стави во тешка ситуација.
Минесота на крилата на Кевин Лав и неговите 23 поени и рекордни оваа сезона во лигата 24 скока од гозтувањето кај Сакраменто си замина со триумф од 97:89.
Покрај него одлично одигра Никола Шековиќ со 16 поени и осум скока, како и Лук Риднур со 18 поени.
Драма имаше и во Филаделфија. Тука гостуваше Далас кој беше поразен со 100:98. Победничкиот шут од линијата за три поени во последната секунда го промаши Џи Краудер.
Еван Тарнер со 22 поени и Тадеус Јанг со 20 поени беа најефикасни во домашниот состав.
Резултати: Филаделфија - Далас 100:98, Кливленд - Феникс 78:91, Хјустон - Торонто 117:101, Сакраменто - Минесота 89:97, Лос Анџелес Лејкерс - Индијана 77:79.
|
