Штрајкот продолжува, пациентите се' понезадоволни

Се' погласни се реакциите на пациентите кои од внатрешноста се препраќаат во Скопје, а тука имаат проблеми да добијат здравствена услуга

Јасмина Јовановска-Вељановска


Како што продолжува штрајкот на лекарите, така се' повеќе расте незадоволството кај пациентите. Се' погласни се реакциите на пациентите кои од болниците во внатрешноста се препраќаат во Скопје, а тука имаат проблеми да добијат здравствена услуга. На Клиниката за гинекологија бремена жена од Кочани имала проблем да и' се направи редовен скрининг. Лекарите не сакале да го направат редовниот преглед на плодот зашто не била итен случај. Откако сопругот почнал да се расправа, зашто не можат да се шетаат по патиштата, бремената жена сепак била прегледана.

На Клиниката за пуломологија, итен случај со вода во градите и околу срцето, кој матичниот лекар го донел директно на одделение, немало кој да го прегледа. Во амбулантата немало лекар, ни во дневната болница, а се' уште не бил дојден ни дежурниот лекар. Жената која едвај дишела, речиси повеќе од половина час останала да чека во ходникот. Пациентката, сепак, била прегледна и прифатена, но откако матичниот лекар изреагирал до директорката на клиниката.

Меѓу пациентите кои се жалат има и одредени ургентни случаи, на кои, иако им била дадена здравствена помош, сепак добиле препорака поради штрајкот да продолжат со лекување дома. Таков случај имало вчера во општата градска болница „8 Септември“, 80-годишна жена со мозочен удар и со одземеност, откако ја прегледале и и' дале инфузија, не сакале да ја задржат во болница. На семејството му препорачале пациентката да ја вратат дома и терапијата да и' ја дава домашна посета. Откако семејството реагирало, пациентката сепак била задржана на болничко лекување.

Од Клиничкиот синдикат велат дека се можни и вакви ситуации.

„Сепак е генерален штрајк на лекарите во здравството“, ни изјави сидникалниот лидер д-р Дејан Ставриќ, кој и пред два дена предупреди дека како ќе продолжува штрајкот, така ќе расте и незадоволството на пациентите. Тој им се извини на пациентите и посочи дека штрајкот не е само за нивниот професионализам, туку и за заштита на пациентите. На колегите им порача посебно да внимаваат да не дојде до несакани последици врз пациентите. „Апелот до лекарите е непотребен бидејќи ниеден лекар поради лична совест и професионализам нема да дозволи да дојде до несакани последици. Вистинскиот апел е до Министерството да се соочи со реалноста дека во ресорот има генерален штрајк во тек“, потенцира д-р Ставриќ, кој додаде дека страдањето сепак ќе биде на товар на Министерството за здравство.

Лекарите веќе две недели штрајкуваат поради платата според сработеното, која Министерството за здравство ја воведе од јули годинава. Лекарите сметаат дека моделот не е добар зашто со него се казнуваат едни лекари за да се наградат други, а пациентите се гледаат само како бројки. Во знак на револт од платата според сработеното, одредени лекари најавија дека ќе си заминат во приватниот сектор.