Моштите на кралот Ахмет Зогу Први вратени во Албанија

Моштите на поранешниот албански крал Ахмед Зогу Први денеска се вратени во татковината. Тој пет децении почиваше на гробиштата во Париз.

На тиранскиот аеродром моштите ги пречекале неговиот внук Лека Втори и други членови на кралското семејство, министерите за внатрешни работи Фљамур Нока, за одбрана Арбен Имами и за култура Алдо Бумчи, како и заменици министрите за надворешни работи Едит Харџи и за одбрана Екрем Спахиа.

Со сите почести, утре моштите ќе бидат погребани во кралскиот мавзолеј во Тирана, додека претпладне од 10 до 12 часот тие ќе бидат положени во Палатата на бригадите во Тирана за да му се оддаде почит.

Одлука за враќање на моштите донесе албанска Влада по повод одбележувањето на 100- годишнината од независноста на Албанија - 28 ноември, додека иницијатива за враќање на останките на кралот и изградба на споменик во Тирана покрена Движењето за легалитет на Екрем Спахиа, кој е владин коалициски партнер.

На владината одлука за пренесување на моштите на кралот во Албанија, реагираа повеќе левичарски партии. Според нив со оваа одлука Бериша го рехабилитира кралот, кој ја напуштил Албанија без да даде отпор на фашистите пред почетокот на Втората светска војна, земајќи со себе големо количество злато.

Ахмед Зогу е роден во 1895 година, а крал на Албанија, како Зогу Први, бил прогласен во 1928 година и останал на тронот 11 години, односно до 1939 година, кога по навлегувањето на италијанскиот окупатор ја напуштил земјата. Починал во Париз во 1961 година.