Хамас пак го ракетираше Израел

Три ракети лансирани од територијата на Појасот Газа денеска одново го погодија израелскиот град Ашкелон, на брегот на Медитеранот, јавува британската телевизија Скај, не соопштувајќи други детали за овој напад. Ашкелон е подолго време цел на ракетните напади на силите на милитантното исламистичко движење Хамас, а во овој град се регистрирани трите цивилни жртви на израелската страна, од избувнувањето на сегашното непријателство во регионот.

Нападот врз Ашкелон кој се наоѓа најблиску до Појасот Газа, што е целосно под контрола на проиранското палестинско движење Хамас, доаѓа откако израелската Армија во т��кот на ноќта продолжи со ракетирањето на „одбрани цели“ врз оваа територија, во кои, според палестинските тврдења, главни жртви биле цивилите.

Ракети уште еднаш се испукани и кон Тел Авив, но скапиот израелски одбранбен антиракеен систем, го штити овој најголем град во Израел да биде погоден, па ракетите на Хамас завршуваат во водите на Медитеранот.

Британските медиуми тврдат дека изминатиот, петти ден од непријателствата меѓу Израел и силите на Хамас, бил досега најжесток и тој доаѓа пред денешната посета на генералниот секретар на ОН, Бан Ки-мун на Каиро. Во египетскиот главен град се наоѓаат и турскиот премиер, како и емирот од Катар, заедно со високи дипломатски функционери на Израел и претставници на Хамас. Бан Ки-мун потоа ќе ги посети и Израел и Газа. Во обидот да се постигне прекин на огнот.

Врз Владата на премиерот Бејамин Натанјаху се врши силен притисок да не се изврши копнена инвазија врз Газа, во операција на чистење на територијата од исламистичките борци на Хамас, но се врши притисок и врз лидерите на ова палестинско движење, да „покажат добра волја за предлогот за преговори“.

Британскиот министер за надворешни работи Вилијам Хејг го предупреди Израел дека „ќе ја загуби меѓународната поддршка што сега ја има и симпатиите за светот, доколку изврши копнена интервенција против силите на Хамас во Газа“.

Израел му даде рок на Хамас од 36 часа за прекин на огнот

Израел му даде рок на палестинското радикално движење Хамас од 36 часа за да ги прифати условите за примирје, во спротивно операцијата ќе се прошири, соопшти израелското воено радио.

Според израелеското радио, Хамас ги поставува следните услови за траен прекин на огнот: да биде отстранета блокадата од Појасот Газа, да се отворат копнени премини, а израелската армија да го прекине ликвидирањето на активисти од движењето и да напаѓа негови борци.

Од своја страна Израел настојува ракетните напади да бидат целосно прекинати, да биде создадена тампон зона за безбедност на источната граница на Појасот Газа и да се спречи шверцот преку подземни тунели, што ќе биде гарантирано од Каиро.

Договорот за безбедност треба да предвидува две етапи: прво целосен прекин на огнот, а потоа широки преговори во врска со условите за долгогодишно примирје.

Истовремено, Израел засега не признал официјално дека негови претставници учествуваат во индиректни преговори со палестинските борци со посредство на Египет.

Според израелскиот вицепремиер и министер за стратешки прашања Моше Јалон воената операција е само една од етапите по патот кој води до мир.

- Нема да се залажуваме дека мирот ќе биде постигнат за време на операцијата, туку откако таа ќе заврши, истакна Јалон.