Декемврискиот самит ја разбранува Атина

Грчките медиуми тврдат дека македонската влада и Филе се обидуваат да преместат земја и небо за членките на ЕУ во декември да дадат зелено светло за Македонија

Од нашиот дописник
Миркица Поповиќ


Атина – Грција засилено работи на подготовките на декемврискиот Самит на ЕУ на кој ќе треба да се соочи и со предлогот за одобрување датум за пристапните преговори за Македонија. Грчките медиуми оценуваат дека мнозинската поддршка на државите членки на ЕУ за предлогот на еврокомесарот Штефан Филе Македонија да добие датум без решен спор со Грција ќе го стави премиерот Андонис Самарас во незгодна позиција да мора да искористи вето. Весникот „То вима“, пренесува дека Самарас за ситуацијата со Македонија разговарал тет-а-тет и со првиот човек на Европската Комисија, Жозе Мануел Баросо. Едно од главните прашања за кои во Грција се бара одговор е какви се гаранциите за неа доколку даде зелено светло за датум за Македонија во декември. Медиумите во Грција пренесуваат една клима на вознемиреност во редовите на грчката влада за предлогот на Фуле и поддршката која ја има од некои држави членки. Иако се зборува дека заткулисно Европската Комисија и Парламентот ја уверуват Грција дека доколку биде одобрен датум во декември, македонската влада ќе омекне и ќе биде полесна за преговори за името, во Грција не веруваат дека премиерот Никола Груевски и со добиен датум ќе стане поконструктивен и покомпромисен соговорник на преговарачката маса.

Грчките медиуми се' погласно коментираат дека македонската влада и комесарот Филе се обидуваат да преместат земја и небо за државите членки на ЕУ во декември да дадат зелено светло по четири години препораки од Комисијата за датум за пристапни преговори за Македонија. Се шпекулира дека доколку биде даден датум, тогаш веројатно преговорите би започнале од втората половина на 2013 година. Весникот „Прото тема“, пак, посочува дека за предлогот на Фуле лобира на големо и Велика Британија. „Заговор на Англичаните за Скопјаните“, е насловот во весникот , кој пишува дека мнозинството на држави-членки на ЕУ не се против предлогот на Филе и се согласуваат дека треба да се донесе одлука која ќе разграничи некои основни приоритети кои Македонија ќе треба да ги задоволи за да може да започнат преговори со ЕУ.

„То вима“ забележува дека Филе не објаснува една клучна работа за Грција: колку долго ќе трае раната фаза во која би морало да се реши името доколку Македонија во декември добие датум со услов за решавање на спорот и какви се гаранциите за Грција доколку таа даде зелено светло за овој предлог. Еврокомесарот веќе неколку месеци е на постојана критика од грчката страна и грчките медиуми, поради неговото инсистирање Македонија да почне претпристапни преговори без решен спор за името. Според весникот „Вима“, пак на средбите на Филе во Атина владеела студена и затегната клима без да има ракување за некаков договор. Филе инсистирал Атина да даде согласност и не се предомислил ни по аргументите кои ги изнеле шефот на дипломатијата Димитрис Аврамопулос и заменик министерот за надворешни работи, Димитрис Куркулас.