16.11.2012, 15:08 Полицајци од седум земји вршат контроли на Богородица
Граничните полицајци во нивните национални униформи детаљно ги претресуваа возилата и ги проверуваат документите
Гевгелија - Гранични полицајци од шест земји од поранешните југословенски простори и од Албанија една недела вршат второлиниска контрола на возилата и патниците на граничниот премин Богородица на македонско-грчката граница. Акцијата се реализира во рамките на проектот за унапредување на граничната безбедност во регионот. Граничните полицајци во нивните национални униформи детаљно ги претресуваа возилата и ги проверуваат документите.
Според директорот на ДКАФ програмата, која има поддршка од Словенија и други земји на ЕУ, главната порака од оваа акција е дека земјите од овој регион се способни и се подготвени да соработуваат и да преземаат заеднички мерки во превенцијата на криминалот, борба против организираниот криминал и нелегалната миграција.
„Очекувањата се огромни. По прв пат се случува тоа и можеме да кажеме дека e историски настан во регионот. Полицајците работат заедно од седум различни земји. Тие со себе го донесоа своето знаење и искуство, а оттука ќе заминат со искуството на македонските колеги. Испраќаме порака на недобронамерните граѓани дека регионот може да соработува и добро го прави тоа и на крајот стандардите ќе бидат исти како што се во ЕУ“, рече Антон Кравнар, директор на ДКАФ од Словенија.
Полицајците од земјите од Западен Балкан акцијата истовремено ја спроведуваат на уште шест гранични премини во регионот и се пофалија дека таму откриле дрога, украдени возила и фалсификувани патни исправи. На Богородица од досега извршените бројни контроли полицајците не откриле незаконско однесување на патниците. (С.Т.)
|
