16.11.2012, 14:11 Триумф на Мартин Кочовски во Ужице
Претставата „Будење на пролетта“ во режија на Мартин Кочовски освои пет награди на 17. Југословенски театарски фестивал
Претставата „Будење на пролетта“ на Франк Ведекинд, а во режија на македонскиот режисер Мартин Кочовски го понесе триумфот на 17. Југословенски театарски фестивал во Ужице, Србија, освојувајќи пет награди. „Будење на пролетта“, која е во продукција на Народниот театар од Ужице, беше прогласена за најдобра претстава на фестивалот, а Мартин Кочовски ја доби и наградата „Ардалион“ за најдобра режија. Маријана Зорзиќ-Петровиќ го понесе и признанието за сценографија, а претставата ги освои и наградите „Ардалион“ за млад актер и „Авдо Мујчиновиќ“, кои им припаднаа на Тијана Караичиќ и Бранислав Љубичиќ.
Југословенскиот театарски фестивал во Ужице „Без превод“ оваа година беше посветен на егзистенцијалните, општествените и политички тегоби на денешниот живот. Под мотото „Овој живот не вреди многу, но ништо не вреди како овој живот, фестивалот во натпреварувачката програма претстави седум продукции од Србија, Хрватска, Босна и Херцеговина и од Црна Гора.
Наградата за најдобра женска улога ја доби Јасна Ѓуричиќ за претставата „Вишновата градина“ на Чехов во режија на Дејан Мијач, а во продукција на Југословенско драмско позориште од Белград, додека за најдобар актер беше прогласен Крешимир Микиќ за улогата во претставата „Од другата страна“, поставена како авторски концепт на Боба Јеличиќ и Наташа Рајковиќ во продукција на Загребачко казалиште младих. Оваа претстава ја доби и Специјалната награда „Ардалион“ за слободата на театарската игра, за заедничката истражувачка работа и за автентичната творечка постапка.
Две награди „Ардалион“ доби и Камерниот театар 55 од Сараево, кој ја изведе претставата „Сомневање“ на режисерката Селма Спахиќ, и тоа: за најдобра епизодна улога на Маја Изетбеговиќ и за костимографијата на Сања Џеба. За наградите одлучуваше петчлено жири, на чие чело беше режисерот Светозар Рапаиќ. (С.У.)
|
