Благој Нацоски во Рим ќе пее македонски дела



Во чест на 21 годишнината од независноста на Република Македонија, нашиот тенор ќе одржи концерт под наслов „Орелски кријла как да си метнех...“; Нацоски во „Ромео и Јулија“

Тенорот Благој Нацоски, во чест на 21 годишнината од независноста на Република Македонија, на 18 ноември ќе одржи концерт во Рим, каде што изминативе години живее и работи. Концертот, кој ќе се одржи во катедралата „Санти Апостоли“, е насловен „Орелски кријла как да си метнех...“, а македонскиот оперски пејач ќе изведе дела од македонските композитори: Живко Фирфов, Трајко Прокопиев, Благој Цанев, Сотир Голабовски, Александар Џамбазов, Томислав Зогравски, Дарија Андоновска и Димитрије Бужаровски. Нацоски на пијано ќе биде придружуван од маестро Алесандро Д’Агостини од Италија.

Инаку, како што вели Нацоски, ова е трет негов концерт на кој изведува дела од македонски композитори во Рим. „Првиот пат се работеше за еден хорски ансамбл од Рим, кој настапи на еден концерт заедно со мене во Ватикан, и кој по моја желба изведе хорски композиции од Трајко Прокопиев и Тодор Скаловски. Но, особено ме радуваше фактот што истиот тој хор, македонските композиции продолжи да ги изведува и понатаму на други нивни настапи, секогаш потенцирајќи го фактот дека се работи за македонско творештво. Се разбира, Македонија како мала земја, која нема музичко творештво долго петстотини години не е лесно да се пробие на тој план во светот. Затоа мислам дека ние уметниците кои настапуваме на светските сцени можеме да помогнеме македонските композитори да заземат место во светската музичка литература. Она што јас се трудам е и моите странски колеги да почнат да изведуваат наши дела“, вели Нацоски.

Делата кои ќе бидат изведени на концертот во недела, истакнува Нацоски, освен од музичка гледна точка претставуваат и врвни дела од најпознатите македонски поети како Кочо Рацин, Контсантин Миладинов, Блаже Конески, Славко Јаневски, Ацо Шопов. „Текстовите на делата се погрижив во програмата да бидат преведни на италијански јазик“, вели тенорот.

Концертот во Рим е организиран со финансиска поддршка од македонското Министерство за култура.

По концертот со македонски дела, Благој Нацоски ќе одржи уште два концерта во Бари, на 22 и 23 ноември. Се работи за „Реквием“ од Моцарт кој ќе биде изведен на фестивалот „Апулиа Мјузик Интернешнл Фестивал“, под диригентската палка на Вито Клементе со оркестарот и хорот „Томазо Траета“.

Инаку, на 12 ноември, излезе во продажба ЦД-то за операта „Ромео и Јулија“ од Шарл Гуно, која македонскиот тенор за прв пат ја изведе оваа година во февруари, заедно со славниот Андреа Бочели. Ова е прво ЦД на Нацоски за дискографската куќа „ДЕКА“, а вкупно петто дискографско издание во неговата кариера. (Т.И.)