19.11.2012, 13:40 Руски фирми сакаат соработка во земјоделството
Бизнисмени од Македонија и од Тамбовската област од Руската Федерација денеска одржаа бизнис-форумот во Стопанската комора на Македонија
Претставниците на компаниите од оваа област потоа посетија неколку конзервни фабрики во Гевгелија и во Струмица заради евентуално склучување договори за извоз на конзервирано овошје и зеленчук.
„Македонија и Тамбовската област по територија и по население се многу слични. За нас е многу интересно да соработуваме пред се' во винската, конзервна и во дел од лесната индустрија. Би сакале на Македонија да и' понудиме шеќер, пченица и сончогледово масло“, изјави претставникот од Тамбовската област, Владислав Михајлович Јуриев.
Според него, интересна е и соработката во другите области, но во овој момент треба да се стави акцент на она за што постои првичен интерес, а потоа да се развиваат и други можности што ќе произлезат од средбите меѓу бизнисмените од двете земји.
Директорот на Македонско-руската стопанска комора, Дејан Бешлиев, нагласи дека трговската размена меѓу Македонија и Руската Федерација годинава бележи пад од околу 40 отсто во однос на лани.
„Тоа пред се' се должи на европската криза. Наша задача како Комора е да ги отвориме патиштата за извоз во Руската Федерација за што сметам дека имаме добри шанси. Токму посетата на бизнисмени од Тамбовската област е резултат на таквите активности“, изјави Бешлиев.
Тамбовската област е федерален регион во Русија, кој се наоѓа на околу 460 километри јужно од главниот град. Тоа е еден од главните центри за нанотехнолошки иновации. Според пописот од 2002 година, во оваа област живеат 1,2 милиони жители, а административен центар е градот Тамбов. (Ек.Р.)
|
