СДСМ: Eдна милијарда евра треба да вратиме од 2015 до 2017

Според потпретседателот на СДСМ Зоран Јовановски, Македонија во период од само три години, односно во 2015, 2016 и 2017 година заедно, ќе мора да врати долг кон странство поголем од една милијарда евра.

„Владата на премиерот Груевски со години безмилосно ги задолжува граѓаните, без притоа точно да се знае намената на тоа задолжување. Сметката за таквото задолжување неизбежно ќе дојде и тогаш ќе се види дека живеењето на кредит што го прави оваа Влада е лажно и изгледа убаво само додека дојде сметката за враќање на долговите“, рече Јовановски.

Тој побара Владата под итно да ги обнови потребните документи за да знаат граѓаните колкав долг ќе треба да враќаме во 2014, во 2015, во 2016, во 2017 година.

„Како граѓани на оваа земја имаме право да ја знаеме сметката од владеењето на премиерот Груевски. Да не испадне после како со долгот на државата кон фирмите, 2,5 години премиерот и министрите го криеја долгот, па после излезе дека не само што има долг туку тој е во милиони евра и ќе мора со месеци да се враќа“, изјави Јовановски.

Во реакцијата на владејачката партија ВМРО-ДПМНЕ се нагласува, дека Македонија е втора земја во Европа која најмалку ја зголемила задолженоста меѓу 2009 и 2012 година.

„Од друга страна, ние секоја година отплаќаме обврски по основ на претходно земени кредити, од претходни влади. Во периодот од 2007 до 2012 година исплативме скоро 400 милиони евра, долгови кои главно беа направени од СДСМ“, велат од ВМРО-ДПМНЕ.(Ек.Р.)