16.11.2012, 21:56 Иванов: ЕУ ни е потребна како мировен проект
Македонскиот претседател во обраќањето пред учесниците на Конгресот „90 години од Пан-Европа“ во Виена
Втората деценија на 21. век мора да биде деценија која ќе го донесе регионот на своето вистинско место во Европа. Повеќе од кога било, нам сега ни е потребна Европската унија како мировен проект. Македонија со нетрпение чека датум за почнување на преговорите за членство во ЕУ, рече претседателот на Република Македонија Ѓорге Иванов во обраќањето пред учесниците на Конгресот „90 години од Пан-Европа“ што се одржува во Виена.
Иванов посочи дека време е да се забрза процесот на проширување и земјите од регионот да бидат примени во својот вистински дом - Европа.
- Последната деценија на 20-от век беше време на изолација и поделба. Првата деценија на 21. век беше време на исцелување на раните, истакна македонскиот претседател.
Тој потенцира дека во четвртиот позитивен извештај на Европската комисија за напредокот на Македонија е нагласено дека земјата ги исполнува политичките критериуми за членство во ЕУ.
Во Извештајот, рече Иванов, ЕК четврти пат по ред даде препорака до Европскиот совет за отворање на преговори со мојата земја за членство во ЕУ.
- Пан-Европа го истакна начелото дека на сите европски држави кои ги исполнуваат условите за членство во ЕУ во однос на демократијата, владеењето на правото и економијата, мора да им се даде можност да го постигнат тоа, дека секоја европска земја има право на членство во ЕУ. Потврдата на ова начело е предуслов за вистинска и веродостојна политика на европско обединување, истакна Иванов.
Тој нагласи дека едно од основните човекови права е правото на идентитет, правото на самоидентификација на секој поединец или група. Иванов посочи дека Република Македонија на тој начин е должна да го заштити правото на граѓаните на самоидентификација и мора да го почитува и гарантира идентитетот и човековото достоинство на сопствените граѓани.
Проблемот настана, појасни претседателот на Македонија, кога беше додаден дополнителен услов кон критериумите - барањето мојата земја да се согласи да го промени идентитетот на сопствените граѓани.
- Очигледно е дека има судир меѓу официјалните критериуми и дополнителните услови, додаде претседателот Ѓорге Иванов.
|
