17.11.2012, 12:35 Мемфис му го нанесе првиот пораз на Њујорк
Мајк Д'Антони дебитираше со победа на клупата на Лејкерси, совладувајќи неговиот поранешен клуб Феникс со победа од 114:102
Нема веќе непоразени екипи во новата сезона од НБА лигата, откако ноќеска Мемфис пред своите навивачи го совлада Њујорк со 105:95. Решавачката предност Мемфис ја направи во третата четвртина која ја доби со 31:18, а најдобри играчи во победничката екипа беа Марк Гасол со 24 поени и Зак Рендолф со 20 поени и 16 скокови. Се истакнаа и Руди Геј со 17 поени и четири скока, како и Мајк Конли, кој мечот го заврши со 16 поени и осум асистенции. Во поразениот тим Кармело Ентони беше стрелец на 20 коша.
Мајк Д'Антони дебитираше на клупата на Лејкерси против неговиот поранешен клуб Феникс Санс со победа од 114:102. И тоа на необичен начин. Имено ги подготви играчите за меч, потоа доби лекарски третман заради оперираното колено, повторно ги советуваше кошаркарите на полувремето и мечот го следеше од соблекувалната.
Коби Брајант уфрли 31 поен, а Мета Ворлд Пис забележа 22 коша од кои пет тројки. Пред натпреварот легендата на Лејкерси, Карим Абдул Џабар доби своја статуа.Во составот на Санс, Горан Драгиќ беше најистакнат со 22 поени и седум скока.
Портланд во продолжение го совлада Хјустон со 119:117, а рекорд на кариерата оствари Николас Батум со 35 поени, додека дебитантот Демиен Лилард придодаде 27 коша.
Резултати: Мемфис - Њујорк 105:95, Индијана – Далас 103:83, Филаделфија – Јута 99:93, Детроит – Орландо 106:110, Минесота – Голден Стејт 98:106, Њу Орлеанс – Оклахома Сити 95:110, Портланд – Хјустон 119:117 (по продолжение), Сакраменто – Атланта 96:112 и Лос Анџелес Лејкерс – Феникс 114:102.
Вечерва играат: Бостон – Торонто, Вашингтон – Јута, Шарлот – Мемфис , Кливленд – Далас, Милвоки – Њу Орлеанс, Сан Антонио – Денвер, ЛА Клиперс – Чикаго и Феникс – Мајами.
Во Источната конференција води Њујорк, пред Милвоки и Бруклин, а на првите три места на Западот се наоѓаат Мемфис, Сан Антонио и ЛА Клиперс
|
