Вашингтон и понатаму е единствениот тим без победа

Мајами на гости славеше кај Феникс (97:98), убедливи партии на Сан Антонио и Лос Анџелес Клиперс

Екипата на Вашингтон и понатаму останува единствениот тим во НБА-лигата кој се' уште ќе ја чека својата прва победа откако во својот осми натпревар сезонава пред домашната публика беше поразен од Јута Џез со 83:76.

За „џезерите“ ова беше втора победа на гостински терен, а до неа ги предводеше Ал Џеферсон со 21 поен и 13 скока.

Бранителот на круната, Мајами, дојде до триумф на гостувањето кај Феникс (97:88). Во отсуство на повредениот Девјн Вејд, работите во свои раце очекувано ги презеде Леброн Џејмс. Минатогодишното МВП и покрај тоа што пред натпреварот поради грип беше неизвесен, сепак одлучи да настапи и во победата на „жешките“ учествуваше со 20 поени и слаба реализација од поле (8/20).

„И кога играм со 50-60% од своите можности сепак е многу подобро отколку да не играм. Знаев дека на тимот му е потребна помош и тоа го сторив, помогнав да дојдеме до победа“, изјави по мечот Леброн Џејмс.

Прв стрелец во редовите на Мајами беше Крис Бош со 24 поени, добра игра прикажаа Батие со 12 и Чалмерс со 11 поени.

Екипите на Сан Атонио и Клиперс имаа одлична вечер која ја крунисаа со убедливи победи. Спарси дојде до осмиот триумф сезонава откако на домашен терен со убедливи 126:100 го порази Денвер. Ова беше натпревар во кој Сан Антонио во три од четири четвртини реализираше по 30 поени. Ману Џинобили со 20 поени беше прво име во победничкиот табор.

Клиперси немаа милост кон Чикаго во Лос Анџелес славеа со 101:80. И на овој дуел главниот збор го имаше Блјек Грифин постигнувајќи дабл-дабл од 26 поени и десет скока.

Резултати: Бостон - Торонто 107:89, Вашингтон - Јута 76:83, Кливленд - Далас 95:103, Шарлот - Мемфис 87:94, Сан Антонио - Денвер 126:100, Милвоки - Њу Орлеанс 117:113, Лос Анџелес Клиперс - Чикаго 101:80, Феникс - Мајами 88:97.


Бајнам нема среќа со повредите

Центарот на Филаделфија Ендру Бајнам се' уште не запиша ниту една минута во дресот на својот клуб, а никој од управата не знае кога точно ќе го стори тоа. Засилувањето од Лос Анџелес веќе третпат го одложува своето враќање на паркетот, а причина за тоа е повредата на десното колено која ја влече уште од минатата сезона. Но, тука не застануваат проблемите за центарот, сега го мачи и левото колено.

„Ја обновив повредата на левото колено. Во моментов работам на опоравување на десното, а сега веќе имам и проблеми со левото колено. Не знам што се случува. Лекарите ми рекоа дека ми е ослабена ’рскавицата и ќе биде потребно време за да зајакне. Не ми преостанува ништо друго освен да чекам“, изјавил Бајнам.