Ел Шарави повторно го спаси Милан

Најдобриот играч сезонава во дресот на „росонерите“ со двата гола се избори за реми на дуелот со Наполи

Наполи и Милан ремизираа, во меч на кој домаќините не успеаја да задржат предност од 2-0. Наполитанците одлично го започнаа мечот и поведоа по само 4 минути кога Интер го изненади гостинскиот голман со шут од преку 30 метри, Абијати беше неподготвен за овој шут на Интер и прими кикс погодок. По точно половина час игра младиот Лоренцо Инсине, кој во стартиот тим го замени повредениот македонски репрезентативец Горан Пандев, го удвои водството на домаќините. Потоа Наполи имаше шанса и за уште еден гол, а по промашената шанса следуваше казна. Најдобриот играч на Милан оваа сезона, Стефан ел Шарави, со шут од околу 17 метри го постигна 9. гол сезонава и најави дека гостите нема да се предадат лесно. Во второто полувреме двете екипи пропуштија неколку шанси, а Ел Шарави на 8 минути пред крајот не пропушти да израмни откако излезе сам пред голманот Де Санктис.

„Овие голови ги посветувам на моите соиграчи, а најмногу на голманот Кристијан Абијати. Тој прими многу лесен гол во почетокот на мечот, но потоа одлично бранеше. Одигравме еден од најдобрите мечеви сезонава и треба да бидеме задоволни. Сега ни претстои тежок меч и во Лигата на шампионите“, рече двојниот стрелец за Милан, Ел Шарави.

За Наполи и Милан ова беше 44. реми во 129 меѓусебни дуели. Милан има 53 наспроти 34 триумфи на Наполи, кој на победа против овој противник се нема израдувано од октомври 2010 година.

Без победник завршија двата дерби-дуели во италијанската Серија А, кои го обележаа 13. коло. Актуелниот првак Јувентус не успеа да го скрши отпорот против Лацио и одигра без голови, а Милан се спаси од пораз на гостувањето во Неапол и одигра 2-2 во дуелот со Наполи.

Лацио во Торино отиде да се брани и на крајот се одбрани од нападите на актуелниот првак. „Старата дама“ доминираше во текот на сите 90 минути, создаде неколку шанси, но ниту еднаш не успеа да го матира гостинскиот чувар на мрежата Фредерико Маркети. Јуве не ја проби згуснатата одбрана на гостите кои играа во формација 4-5-1. Единствено Козак беше во нападот на Лацио, но не претставуваше опасност за голот на Џиџи Буфон, бидејќи гостите во текот на целиот меч не упатија ниту еден шут.

Најголемата шанса Јувентус ја имаше во 70. минута кога Леонардо Бонучи ја погоди пречката. Претходно промашуваа Кваљарела и Џовинко, а гостинскиот голман Маркети имаше и неколку одлични одбрани. Ова е втор меч во низа на кој Јувентус не може да победи пред своите гледачи. Пред две недели тимот со 1-3 загуби до Интер со што ја прекина серијата од 49 меча без пораз.

„Лацио одигра во класичен катеначо стил. Постојано напаѓавме, но ги пропуштивме сите шанси. Кога ќе шутневме во рамките на противничкиот гол, нивниот голман фантастично бранеше. Немавме среќа, бидејќи ја погодовиме и пречката“, вели помошник-тренерот на Јуве, Анџело Алесио.

Ремито е 35 меѓу овие два тима, а Јувентус останува многу поуспешен тим. Екипата од Торино досега 70 пати се радувала на победа, а римјаните останаа на 32 победи. Ова реми е вкупно петто во последните 16 меѓусебни дуели. Лацио нема победа против „старата дама“ во последниве девет години.