(ФОТО) Славје на улиците на Загреб по ослободувањето на генералите



Граѓаните на Загреб, собрани на главниот плоштад Бан Јелачиќ, како и во другите градови низ Хрватска, со бурни овации ја поздравија ослободителната пресуда за Маркач и Готовина.

Хрватскиот претседател Иво Јосиповиќ го поздрави денеска ослободувањето во Хаг на генералите Анте Готовина и Младен Маркач, но предупреди и на обврската на државата да ги казни извршителите на злосторствата.

- Пресудата ја зајакна мојата доверба во меѓународното право и правда. Се покажа дека Готовина и Маркач не се виновни и дека хрватското раководство и оружените сили не дејствувале како организирана злосторничка акција, која имала за цел протерување на нашите сограѓани од српска националност. Се потврди дека Хрватска нема извршено етничко чистење и дека борбата на нашите бранители за слобода била праведна и чесна, изјави Јосиповиќ на прес-конференција во Загреб.

Тој додаде и дека денешната ослободителна пресуда претставува сатисфакција за сите жртви, на кои в недела ќе им оддаде почит во Вуковар.

- Генералите Готовина и Маркач поминаа без никаква вина осум години во затвор и тоа не е лесно ниту за нив, ниту за нивните семејства. Сакам да им заблагодарам за она што го направија за својата татковина, додаде Јосиповиќ.

Хрватскиот премиер Зоран Милановиќ изрази задоволство од пресудата на судот во Хаг, додавајќи дека Хрватска „ќе го исполни долгот на правдата“ за тоа каде што згрешила во текот на војната.

- Ни падна камен од срцето. Траеше многу години и важно е дека луѓето доаѓаат дома кај своите семејства, но важно е и за Хрватска бидејќи во се имаше многу преседани и многу политика, истакна Милановиќ.

Тој додаде дека по Готовина и Маркач денеска со владиниот авион во Хаг ќе заминат хрватскиот министер за одбрана Анте Котромановиќ и министерот задолжен за прашања на воените ветерани Предраг Матиќ - Фред.

Според министерот Матиќ, „се што знаела Хрватска, сега е обелоденето во светот“.

- Водевме ослободителна војна, се браневме и одбранивме, а посебно им е тешко на генералите за сите овие години кои ги поминаа неправедно во затвор. Горд сум на бранителите кои покажаа како може да се бори, а веројатно и молитвата придонесе пресудата да биде ваква, објасни Матиќ.

Граѓаните на Загреб, собрани на главниот плоштад Бан Јелачиќ, како и во повеќе други градови ширум земјата, со бурни овации ја поздравија ослободителната пресуда за двајцата генерали.

На плоштадот присуствуваат околу 7.000 луѓе, најмногу ветерани кои пристигнаа во воени униформи и знамиња, скандирајќи „Анте! Анте!“.