Орав на консултации, Брисел се правда

Македонскиот државен врв бара објаснување од евроамбасадорот за користење на терминот Славомакедонци. „Погрешно сте разбрале“ - велат од кабинетот на комесарот Филе. „Орав не држел говор, туку само дискутирал“

Слободанка Јовановска


Претседателот Ѓорге Иванов вчера го повика евроамбасадорот Аиво Орав на итни консултации, поради именувањето на Македонците како „славомакедонци“ во неговиот говор пред членовите на Комисијата за надворешни работи на Европскиот парламент. Според извори во кабинетот на македонскиот претседател, Иванов побарал од евроамбасадорот јавно да му се извини на македонскиот народ и да изрази почит кон основниот принцип на самоопределување и самоименување.

Со реакција вчера се јави портпаролот на еврокомесарот Штефан Филе, Петер Стано, според која Филе бил погрешно интерпретиран во интервјуто за Ројтерс во кое стоеше дека мнозинскиот народ во Македонија го нарекол „словенско население“.

„Интервјуто на комесарот Филе за Ројтерс беше погрешно толкување на дискусија. Позицијата на Комисијата наспроти вашата земја е јасно утврдена во најновиот извештај за напредокот и нема ништо ново што да се додаде“, изјави портпаролот Стано.

Дополнително, Стано во изјава за нашиот весник вели дека терминот „славомакедонци“ бил користен за време и во контекст на вербална дискусија. Тоа не беше политичка изјава и не изразува никаква политичка позиција, изјави вчера Стано за „Утрински весник“. Тој најави дека амбасадорот Орав сам ќе излезе во јавност да го образложи својот настап во ЕП.

Како подметнување, ставањето на неговото име во контекст на неупотребата на зборот „македонски“ го нарече вчера и екс амбасадорот Ерван Фуере, со порака дека новинарите што го прават тоа ги служи селективна меморија, односно го критикуваат по инерција. Фуере потсети дека тој, додека амбасадоруваше во Македонија, никогаш не го употребил термин „славомакедонци“ ниту пак го употребил името БЈРМ, туку Македонија, и тоа само кога зборувал на официјални меѓународни состаноци.

„Јас секогаш го нарекувам македонскиот јазик македонски, Македонците како Македонци за што често бев повикуван од грчките власти. Ова е уште еден обид на вашата влада да го сврти вниманието од вистинските проблеми“, изјави вчера Фуере.

Постапката на Орав претходно ја осуди и Владата со соопштение, а вчера Орав беше примен и во Министерството за надворешни работи иако поводот не е сигурен.

„Со ваквиот однос не се придонесува кон решение на отвореното прашање кое нашата земја го има со јужниот сосед. Изразуваме силно несогласување, протест и осуда на тоа. Доколку ова е нечија идеја со различно однесување на определени претставници Европската комисија во еден момент да ни се допадне нам користејќи го терминот ’македонски’, а во друг момент да им се допадне на нашите соседи користејќи го терминот ’славомакедонци“, треба да биде свесен дека со ваков однос никако не придонесува кон решавање на отвореното прашање. Со овој однос, свесно или несвесно се покажува дека отвореното прашање не е само за името на нашата земја, туку и за идентитетот, со што и самата ЕК ја вовлекува на опасен терен во еден спор чии рамки се дефинирани од страна на ОН“, стоеше во реакцијата на Владата.

Инаку во последниот извештај на Комисијата за напредокот на Македонија, беше избегната употребата на македонски јазик, нација и народ, а придавката „македонски“ беше употребена само за именување на Владата и институциите.