10.11.2012, 12:52 Петар Темелковски добитник на наградата за животно дело „Петре Прличко‘‘
Наградата му е врачена во рамки на програмата на Денот на Општина Велес - 9 Ноември
На сцената на Народниот театар „Јордан Хаџи Константинов-Џинот‘‘ во Велес доцна синоќа му беше врачена Актерската награда за животно дело „Петре Прличко‘‘ за 2012 на актерот Петар Темелковски.
Наградата му е врачена во рамки на програмата на Денот на Општина Велес - 9 Ноември, која општина Велес по седми пат ја доделува заедно со Здружението на театарски работници „Џинот‘‘.
- Восхитен сум, радосен и горд што ја добивам наградата која го носи името на Петре Прличко, доајенот на македонското глумиште. Зборот легенда во последниве години е многу банализиран. Ако некој го заслужува епитетот легенда тоа со право е Петре Прличко. Затоа треба да внимаваме како го употребуваме неговото име. Петре Прличко е легенда чии дела односно бројни филмски и театарски улоги се бесмртни, изјави Темелковски.
Високата награда, актерот Петар Темелковски ја добива за своето четириесетгодишно искуство на театарската сцена и филмското платно. Темелковски има одиграно преку 70 главни ликови во македонските и театрите во соседните земји. Добитник е на повеќе награди.
Во чест на наградениот, велешкиот театарски ансамбл ја одигра претставата „Шашардисани времиња‘‘ во режија на Стојан Стојановски, а по текст на Благоја Ристески-Платнар.
Наградата „Петре Прличко‘‘ - статуетка со ликот на Петре Прличко и паричен износ од 30 илјади денари се доделува од 2006 година, а досега је имаат добиено Благоја Спиркоски-Џумерко,Емил Рубен, Петар Мирчевски, Благоја Чоревски, Мето Јовановски, Борис Чоревски и годинашниот лауреат Петар Темелковски
|
