Викенд со мирисот на пита-пастрмалија

Откриен документ во кој пишува дека во Велес се приготвувала пастрмалија уште во 1869 година

Изминатиот викенд Велес беше окупиран од љубителите на познатата велешка пастрмалија. Се одржа ,,Велешката пастрмалијада“. Процените се дека за три дена се изедоа околу 12 илјади парчиња пити. Десетина ресторани и неколку винарници им го понудија на гостите традиционалниот специјалитет пита-пастрмалија. Нивните капацитети беа премали за да се задоволат барањата на илјадниците гости, па затоа во редици се чекаше за се дојде до парче пита. Се чекаше и по еден час за да се дојде на ред за пита и место. П��сетители имаше од цела Македонија кои беа примамени од неповторливиот вкус на питата богата со пастрма – овчо сушено месо прелиено со јајца. Велешани, горди на својот специјалитет, не ја пропуштија можноста да дојдат во родниот град.

„Кога дознав дека ќе има ваква манифестација, испланирав овој викенд да дојдам дома. Тука сме со соседите, роднините и се насладуваме на пастрмалија. Има и одлично вино и се' заедно е прекрасно доживување. Така истовремено се видов со моите блиски, но и ја пробав познатата пастрмалија. Неа ја сакаше и мојот сопруг, кој ја изгради Топилница, а од Велес замина со силната љубов кон овој специјалитет“, вели Ана Волева-Руп, сопруга на германскиот инженер Валтер Руп, креатор на техничкиот дел од изградбата на велешка Топилница и автор на антологиската изјава ,,Топилница гут, Велес капут“, кој пролетоска починал.

Убавото време привлече илјадници гости. Забавата навечер со познатите македонски поп-ѕвезди ги привлече помладите. Рестораните последната порачка ја носеле во саботата на полноќ, но и тоа било премалку за нараснатите апетити на гостите. Понудата од традиционалниот специјалитет пита-пастрмалија залеана со црно вино, можноста да се видите со познати или пријатели ги изнесе велешани од домовите, а гостите од другите градови ги донесе во Велес.

„Вкусот на пастрмалија е единствен и неповторлив, кој пробал знае. Јас сум велешанка која живее во Скопје. Но, не ја пропуштам оваа манифестација да дојдам во родниот град и заедно со сопругот и друштвото да вкусиме оригинална пастрмалија. Пита без пастрма е се' друго, само не пастрмалија“, вели Данче Делова. Велешани се горди на тоа што ова е најстарата ваква манифестација во земјава, в година ќе биде јубилејна - десетта. Градоначалникот на Велес потсети на традицијата дека велешани прават пита иста како и онаа од еден и пол век. Општинските власти преку турски истражувач дошле до невообичаен податок, дека таа се подготвувала по истиот рецепт како и сега, уште во далечната 1869 година.

„Дојдовме до пишан документ од почетокот на 1869 година, во кој се зборува дека од 5 до 19 јануари две илјади турски војници додека престојувале во Велес биле ранети со тесто посипано со овчо сушено месо прелиено со јајца. И по толку време, останавме верни на традицијата и на оригиналот“, изјави Горан Петров, градоначалник на Велес. Фестивалот на храната траеше три дена. (П.П.)