Композиторот Елиот Картер почина на 104 години

Картер е добитник на две Пулицерови награди, а неговите дела се изведувани низ целиот свет

Американскиот композитор на класична музика Елиот Картер почина вчера на 104 години во Њујорк. Иако не доволно познат на пошироката публика, Картер важеше за еден од најугледните автори во музичките кругови, но посебно кај критиката. Добитник е на две Пулицерови награди, првата во 1960 година за Гудачкиот квартет бр. 2 и втората во 1973 година за Гудачкиот квартет бр. 3. Неговите дела, кои се во значително голем број, а кои ги опфаќаат сите форми на компонирање, критиката ќе ги оцени како мошне комплексни, во кои ритмиката има посебна улога. „Њујорк тајмс“ во 2002 година ќе објави дека неговите Гудачки квартети се меѓу „најтешката музика досега компонирана“.

И покрај годините, Картер до крајот на животот бил активен како композитор, а нова нарачка примил и на прославата на својот 100. роденден во 2008 година во „Карнеги хол“. Во 1985 година, Картер бил еден од десетте добитници на првиот Национален орден за уметност. Неговата нова композиција за Камерен оркестар „Instances“ ќе биде премиерно изведена во февруари следната година.

Картер, кој студиите ќе ги заврши кај познатиот педагог Надја Буланже во Париз во 1930 година, за потоа да се врати во САД, велел дека Европејците подобро ја разбираат неговата музика отколку неговите сонародници, бидејќи, според него, во Европа музиката не претставува само забава, туку составен дел од културата, „нешто што луѓето се трудат да го разберат“.

Во текот на својата кариера, Картет се нурнувал во различни творечки фази, од неокласицизмот, атоналната музика, до ритмички комплексната музика. Неговите дела се изведувани низ светот. (Т.И.)