Груевски е за плата по успешност

„Плаќањето според сработеното е една од клучните мерки во здравството што се спроведува сега“, рече премиерот Груевски, а за штрајкот остана на ставот на министерот

Јасмина Јовановска-Вељановска

И премиерот Никола Груевски е за тоа лекарите да се плаќаат според сработеното. Тој и официјално застана зад министерот Никола Тодоров и проектот плата по успешност. „Плаќањето по успешност е една од клучните мерки во здравството предвидена во предизборната програмата што мнозинството граѓани ја гласаа, а сега ја спроведуваме. Ова е ставот на Владата“, изјави вчера Груевски по промовирањето на новите лаборатории на Институтот за микробиологија. За се' друго околу платата и штрајкот на лекарите премиерот рече дека објаснил министерот, избегнувајќи директно да одговори дали штрајкот за кој три месеци се препукуваат лекарите и министерот е законски или не.

А, Тодоров и натаму смета дека штрајкот е незаконски и дека клиничките лекари ја повторуваат истата грешка како и со првиот штрајк. Но, тој одби да каже што е незаконски во штрајкот и само појасни дека незаконитостите се содржат во одлуката на судот кој го стопира првиот штрајк. Според него, не се точни ни реакциите на лекарите, бидејќи платата по успешност не е дел од закон, туку е одредба и не може кривично да одговараат за внесување лажни податоци.

„Повторно лекарите имаат лоши правници кои ги советуваат, исто како и за организирање на штрајкот“, беше коментарот на Тодоров.

Првиот човек во здравството и натаму е на мислење дека штрајкот не е генерален, бидејќи, како што вели, не го организира Гранковиот синдикат, кој за него е единствениот репрезентативен синдикат. Тој избега и не одговори дали ќе ја прифати вчера понудената рака за помирување на Клиничкиот синдикат.

„Како може да не биде генерален кога ќе штрајкуваат лекарите кои се носители на дејноста. Зар ќе прегледуваат сестри и болничари“, беше контракоментарот на првиот човек на клиничкиот синдикат д-р Дејан Ставриќ. Тој ги отфрла обвинувањата на министерот дека штрајкот е фарса и има политичка заднина.

„Штрајкот е чисто професионален“, потенцира Ставриќ, кој смета дека на министерот не му се јасни законските одредби како се исплаќа плата во услови на штрајк.

За клиничките лекари кривичните пријави и неисплаќањето плата за време на штрајк е само закана од министерот за да ги поколеба оние кои веќе одлучиле да штрајкуваат. „Штрајкот на војската може да се забрани само ако има војна. Исто важи и за лекарите. Штрајкот е демократско право и ако тој е регуларно пријавен, не може да се забрани или да се рече дека е незаконски. Не може министерот само да не' мава, а ние да не смееме да се жалиме. Директорите се тие кои треба да ги обезбедат минималните услови за работа во штрајк“, вели дигестивниот хирург Милчо Пановски.

А преговорите со гранковиот синдикат течат. За денеска е закажана нова средба со Тодоров. „Има позитивно поместување за коефициентот за пресметување на платите и ќе има одредено покачување на платата, колкаво не се знае, но ќе се постигне односот еден спрема два за лекарите“, велат од гранковиот синдикат.

И овој синдикат не отстапува од ставот плаќањето да биде по систем на наградување, односно да не биде платата по успешност каде што ќе има наградени и казнети лекари. „На лекарите не им е толку до казнувањето, колку што е важен пристапот во пресметката на платата. Се' уште има услуги кои не може да се препознаат за да се вреднуваат и да влезат во пресметките за плата, како што нема ни прецизен начин за вреднување на трудот“, велат од гранковиот синдикат.