13.11.2012, 10:24 И американски командант во Авганистан во љубовна афера
Љубовната врска на генерал Џон Ален со Џил Кели, втората жена во аферата со шефот на ЦИА, Патреус, го стресе Пентагон
Генералот Џон Ален, висок американски и НАТО-командант во Авганистан, е под истрага поради, како што наведе виш официјален претставник на одбраната во вторникот изутрината, „непримерна комуникација“ со Џил Кели, жената од Тампа која Пола Бродвел, жената која имала вонбрачна врска со Патреус, ја сметала за ривалка за вниманието на Дејвид Патреус. Во соопштението до новинарите во неговиот авион на пат кон Австралија, во вторникот изутрина��а, секретарот за одбрана, Леон Панета, изјави дека ФБИ во неделата му го предаде „случајот“ на генералот Ален на Пентагон.
Панета му го предаде случајот на генералниот инспектор на Пентагон да спроведе истрага за тоа што официјалниот претставник на одбраната кажа дека биле 20.000-30.000 страници документи, многу од нив електронски пораки меѓу генералот Ален и Кели, која е мажена и има деца и живее во Тампа, Флорида. На прашањето дали ФБИ утврдило дека има кривично дело, лицето од одбраната одговори: „Тоа треба да го прашате ФБИ“. Официјалното лице, кое ги информираше новинарите во авионот на Панета, изјави дека „постои јасна можност“ оти електронските пораки биле поврзани со тековната истрага на ФБИ за Патреус и Бродвел.
Официјалното лице од одбраната изјави дека генералот Ален, кој, исто така, е оженет, на официјални лица од Пентагон им кажал дека не направил ништо лошо. Ниту тој ниту Кели вчера не беа достапни за коментар. Во соопштението од Панета се фали генералот Ален за неговото командување во Авганистан и се наведува дека „тој има право на соодветен процес за ова прашање“.
Но, истрагата на генералниот инспектор на Пентагон отвори нешто што би можело да биде голем скандал за двајца од најистакнатите генерали на нивната генерација – Патреус, кој беше главен командант во Ирак и во Авганистан пред да се повлече од армијата и да стане директор на ЦИА, од каде што во петокот поднесе оставка поради аферата, и генералот Ален, кој, исто така, беше на служба во Ирак и сега командува со 68.000 американски војници во Авганистан.
И покрај тоа што генералот Ален ќе остане командант во Авганистан, Панета изјави дека побарал од претседателот Обама да го стави во мирување именувањето на генералот Ален за командант на американските сили во Европа и врховен командант на НАТО-силите, две позиции што требаше да ги преземе, како што се очекуваше, по добивање лесна потврда од Сенатот. Панета наведе дека Обама се согласил со неговата одлука.
Официјалното лице од одбраната изјави дека електронските пораки меѓу Кели и генералот Ален биле разменувани во периодот од 2010 до 2012 година. Тој не можеше да објасни зошто има толку многу страници со препис на електронските пораки и не откри детали за нивната содржина. Исто така, наведе дека не може да објасни како електронските пораки меѓу Кели и генералот Ален се поврзани со оние меѓу Патреус и Бродвел, и оние на Бродвел и Кели.
Она што досега се знае е дека Кели минатото лето отишла во ФБИ откако била загрижена од вознемирувачки електронски пораки. ФБИ почна истрага и дозна дека пораките биле од Бродвел. На пат кон потрагата по електронските пораки од Бродвел, ФБИ ги откри пораките меѓу Бродвел и Патреус што индицирало дека тие двајца имаат вонбрачна афера. Бродвел, наведуваат официјалните лица, ја гледала Кели како ривалка за љубовта на Патреус.
Официјалното лице од одбраната изјави дека не знаел од каде генералот Ален и Кели се познавале. Генералот Ален од јули 2011 година е во Авганистан како американски командант, додека претходно живеел во Тампа како заменик-командант за Централната команда, која ги надгледува американските воени операции на Блискиот Исток. Официјалното лице уште наведе дека Пентагон добил 20.000-30.000 страници документи од ФБИ и моментално ги проучува. (Њујорк тајмс)
|
