Грција: Отстапки или збогум на датумот!

Грчкото МНР до сега нема излезено со официјален став и оцена на одговорот

Од нашиот дописник
Миркица Поповиќ

Атина - Се' додека македонската Влада не е подготвена да направи отстапки, залудно би било да се надева дека Грција ќе попушти за членството во ЕУ и НАТО. Ова е оцената на грчкиот весник „Димократија“ по одговорот на македонската Влада на грчкиот предлог-меморандум за соработка. Весникот забележува дека одговорот не бил никакво изненадување за Грција, односно ги потврдил предвидувањата дека македонската Влада ќе се фокусира силно на Привремената спогодба и пресудата од Хаг.

„Јасно е дека Скопје не се поместува ни еден милиметар од нивните позиции. Поради тоа, единственото на кое може да се надеваат е дека ќе продолжи негативниот грчки став кон нивниот обид да станат членки на ЕУ и НАТО“, пишува „Димократија“, весник кој се смета за близок до грчката Влада и кој прв го објави одговорот на грчкиот премиер Адонис Самарас до премиерот Никола Груевски. Со оваа оцена весникот го повторува ставот што го слушнавме од грчкиот претседател Каролос Папуљас, кој нагласи дека Грција нема да даде согласност доколку не се најде заеднички прифатливо решение за конечно име за севкупна употреба. Според „Димократија“, меморандумот во суштина ќе претставувал мапа во кој правец ќе одат билатералните односи меѓу двете држави.

Весникот забележува дека и во некои кругови на грчкото Министерство за надворешни работи имало многу негативни оцени предизвикани од одговорот. „Дали е можно да разговараш со најголемиот крадец кој...одбива да биде уапсен и да веруваш искрено дека има место за компромис?“, пишува весникот пренесувајќи реакција на раководител од грчкото МНР, веднаш по читањето на одговорот. Се оценува дека македонската Влада како дипломатски трик го користи објаснувањето дека, штом Македонија ќе влезе во ЕУ, двете страни ќе се зафатат со решавање на работите кои ги обединуваат, вешто избегнувајќи да спомене во одговорот дека Грција го има поставено како предуслов решавањето на спорот за името. Друг дел од одговорот, кој според весникот има цел да ја нападне Грција и да потенцира дека Македонија победила во дипломатските кругови е потцртувањето на фактот дека треба да се почитуваат сите одлуки и обврски што досега се договорени, со што во суштина Македонија и' посочува на Грција дека не ја почитува Привремената спогодба. „Во текстот се споменува и пресудата од Хаг, преку која другата страна се обидува да го „издрибла“ грчкиот предлог за прифаќање име со географска одредница“, пишува весникот.

Грчкото Министерство за надворешни работи до сега нема излезено со официјален став и оцена на одговорот. Единствената официјална реакција дојде од претседателот Папуљас, кој потенцираше дека македонската Влада не одговорила позитивно на грчката иницијатива.

„Димократија“ пред извесно време пишуваше дека по посетата на еврокомесарот Штефан Фуле во грчкото МНР владее загриженост за спорот со Македонија и предупреди дека она што треба да ја вознемири грчката Влада е фактот што Комисијата одлучила директно да се вмеша во решавањето на спорот преку предлогот за паралелно преговори со ЕУ и преговори за името, што според весникот не е во рамките на нејзините надлежности.