13.11.2012, 15:18 Нападната базата со македонски војници во Кабул
Министерот Фатмир Бесими телефонски разговараше со војниците. За, среќа нема повредени меѓу нив
Четири ракети денеска изутрина завршија во близина на базата во која се сместени македонските војници кои учествуваат во силите на ИСАФ во Кабул, Авганистан. За среќа повредени нема. Министерот за одбрана Фатмир Бесими и началникот на Генералштабот на АРМ, Горанчо Котески вчера од касарната во Тетово телефонски контактираа со војниците за од „прва рака“ да се информираат за случувањата во базата.
„Имав директен контакт со командантот на нашите сили. Информацијата е дека имало вооружен напад, но дека нема никакви последици по припадниците на АРМ. Нашите припадници се подготвени да продолжат да ги извршуваат своите задачи за кои се наоѓаат во Авганистан“, информираше министерот Бесими во касарната „Кузман Јосифовски – Питу“ во Тетово.
Според извори од министерството, нападот се случил во раните утрински часови, а четирите ракети завршиле во близина на базата, но животите на нашите војници во ниту еден момент не биле загрозени.
Како што јавуваат светските агенции, ова е прв напад на Кабул по оној во септември, кога загинаа осум јужно Африканци и четворица Авганистанци. Во ракетниот напад едно лице загинало, а тројца се повредени откако ракета избувнала во близина на зградата на авганистанската разузнавачка агенција во Кабул, а две други на пат за аеродромот и до приватна ТВ станица. Началникот на полицијата во Кабул, Ајоб Саланги изјавил дека ракетите биле истрелани од источните делови на главниот град. Засега никој не преземал одговорнст за ракетниот напад.
Веста за нападот на војниците во Кабул се прошири за време на посетата на министерот Бесими на касарната во Тетово, каде се разговараше за трансформацијата и преструктурањето на АРМ, како и за развојот на нејзините способности.
На средбата учествуваа и највисоките претставници на оружените сили на АРМ меѓу кои началникот на Генералштабот, генерал мајор Горанчо Котески, Обраќајќи им се на војниците и старешините, министерот Бесими рече дека вакви работи се одржуваат во сите касарни во земјата, дека претставуваат дел од проектот „Стандард“ чија основна цел е подобрување на условите за работа во касарните.
Министерот Бесими рече дека како последица на светската економска криза се чувствува рестрикција на буџетот за одбрана. Тоа условува да останат малку средства за модернизација и опремување. Сепак, Бесими рече дека поголем дел од новите униформи веќе се пристигнати и дека се работи на реновирање на дел од касарните заради подобрување на условите за работа. „Решение се бара во рационализација и преориентација. Во рамки на НАТО се промовира паметна одбрана која базира на принципите на специјализација, приоритизација и мултинационални решенија“, рече Бесими.
На средбата во касарната во Тетово министерот подвлече: „Сепак сметаме дека има потреба од повеќе средства за одбраната. Владата покажа спремност да се предвидат дополнителни средства, до колку буџетот за обрана биде условуван за членство во НАТО. Никогаш нема да дозволиме да се стави под знак на прашалник нашето членство во НАТО гледано од аспект на потребниот буџет за реализација на реформите, учество во меѓународните мировни мисии и исполнување на стандардите на НАТО“, нагласи министерот.(Г.Е-Д.Т.)
|
