И Романија најавува блокирање

Софија, Атина и Букурешт ја обединија позицијата околу препораките на Брисел

Слободанка Јовановска


Грција бара сојузници за да ја блокира Македонија на декемврискиот самит на Европската унија. Откако сфати дека сама, односно со Кипар, нема политички и морален кредибилитет да стави вето на четвртата препорака за преговори, покрај Бугарија на помош ја викна и Романија, која својата политичка сила во ЕУ ја измери веќе еднаш со заканата за евроинтеграцијата на Србија.

Вчера во Софија се одржа неочекувана средба на шефовите на дипломатиите на трите земји, а со цел да ги „ускладат“ своите позиции околу евроинтеграцијата на Земјите од Западниот Балкан, при што главна тема била нашата земја. Според изјавата што по средбата ја даде романскиот министер за надворешни работи Тит Корлатеан, и Букурешт не е далеку од тоа да исправи некоја своја пречка на патот на нашата држава. Тој, имено, го поздравил меморандумот што Грција го испрати на Македонија со забелешка дека „очекува добар одговор од македонска страна“, иако одговорот одамна стигна.

„Ние секогаш даваме поддршка, но има критериуми што треба да се почитуваат и од страна на БЈРМ“, рекол романскиот шеф на дипломатијата, практично солидаризирајќи се политички со Атина и Софија. Ваквиот сојуз зад грбот на Македонија се случи додека нашиот шеф на дипломатијата ја троши енергијата во Виетнам и Индонезија, а сите други од државниот врв кои досега беа гласни во надворешната политика, сега се свртени кон споредни прашања.

На состанокот вчера во Софија министерот Николај Младенов и натаму тврдеше дека неговата држава нема проблем со Македонија туку со националистичкиот говор кај нас и ја повика нашата политичка елита да се води од принципите предложени во контроверзната декларација за пријателство и соработка, со порака ако го стори тоа - формата и начинот како ќе се разрешат недоразбирањата не се важни. Грчкиот шеф на дипломатијата пак нагласил дека без решавање на името нема начин како Македонија да влезе во ЕУ, порачувајќи дека и натаму чека одговор од македонска страна бидејќи одговорот што го прати министерот Никола Попоски не бил тоа.

„Тие ни' испратија писмо. Го отворивме, но реално се' уште немаме одговор. Чераме и се надеваме на подобро решение од нашите соседи. Испративме предлог, нека одговорат“, изјавил Димитрис Аврамопулос ултимативно, јасно сугерирајќи дека чека конкрети отстапки околу предложените црвени линии.

На ваквиот собир вчера реагираа бугарските социјалисти повикувајќи од прес конференција Софија да не става вето на Македонија, бидејќи тоа ќе влијае негативно на имиџот на земјата. Тие исто така побараа да се прави разлика меѓу властите и граѓаните на Македонија, исто како што не може да се оценува бугарскиот народ според владењето на Бојко Борисов.

Според Кристијан Вигенин ако бугарскиот има близок народ на Балканот, тоа е македонскиот, и не треба да се дозволи да ги делат популистички влади. На нашата Влада, пак, и порача дека ги запоставува економските проблеми на сметка на популистички проекти кои можат да ни наштетат во евроинтеграцијата. На крајот Вигенин побара од Младенов да се сретне со Попоски и препорача создавање експертска комисија која ќе ги фиксира зоните на тензии и ќе работи на нивно отстранување.