Лекарите му се заканија на министерот со долг штрајк

Докторите со контранапад до Тодоров: доколку настрада некој од штрајкувачите, утре ќе има целосен прекин на работата

Јасмина Јовановска-Вељановска



Околу 1.300 лекари од клиниките и болниците во земјава се решени да штрајкуваат утре за да го изразат незадоволството од платата по успешност, која значи да добијат плата според тоа колку пациенти прегледале или оперирале. Но, ако продолжат притисоците и заканите и ако поради измислен изговор спротивно на законските прописи настрада некој од штрајкувачите, лекарите на првиот човек во здравството му порачаа дека целосно ќе ја прекинат работата. Со ваков контранапад вчера излезе Клиничкиот синдикат на заканите на министерот за здравство, Никола Тодоров, дека лекарите ќе претрпат штетни последици ако штрајкуваат. Лекарите не само што не се откажуваат од штрајкот, кој стартува утре во 7,30 часот, туку се решени да издржат додека не се најде компромисно решение со нивниот работодавец - министерот. Штрајкот ќе се одржи бидејќи лекарите сметаат дека ваквото плаќање е неправедно, дека со тоа се девалвира квалитетот на прегледот и тимската работа, а за да заработат мора да се во трка по пациенти.

Заканата од белите мантили, како што велат во Клиничкиот синдикат, дошла по многубројните притисоци од министерот и откако не успеаја да остварат каков било контакт со него.

„Повикан јавно со одлуката за штрајк Тодоров не изрази подготвеност ниту за преговори, ниту за изготвување правила за работа во услови на штрајк, кои би ги усвоиле спогодбено. Затоа, беспредметно е тврдењето за негова грижа за штетните последици по членови на штрајкувачкиот одбор и пациентите од ’нелегално‘ организиран штр��јк. Прашуваме со кое право министерот, иако ги знае ’нелегалните постапки‘ во одлуката за штрајк, не ни ги соопштува, туку не' остава нас и пациентите да трпиме штетни последици од ваков, според него нелегален штрајк“, прашуваат од Клиничкиот синдикат.

Чашата на трпението на лекарите се прелеала посебно откако вчера низ лекарските кругови и на клиниките наголемо се зборуваше дека за в среда, за кога планираат штрајк, им се готви некакво сценарио за хаос со пациентите. Муабетите одеа до таму што планот бил на клиниките да дојдат колку што е можно повеќе болни со цел да се создадат невидени турканици и поголеми нервози меѓу пациентите и лекарите. Во ова би биле инволвирани матичните лекари кои би испраќале што повеќе итни случаи, но и редовно хронични болни.

„Има притисоци, од намалување на плата, префрлање лекари од едно работно место на друго или во друга болница, па и други кои ќе ги соопштиме в среда кога ќе почне штрајкот“, ни изјави претседателот на Клиничкиот синдикат Дејан Ставриќ.

Тој рече дека се подготвени утре да штрајкуваат на своите работни места, а доставени се и правилата за минимално обезбедување работа во услови на штрајкот. Пациентите што ќе дојдат на клиниките нема да се враќаат, туку ќе се прегледуваат, а за натамошно лекување ќе бидат прифаќани само итните случаи. На другите болни ќе им се закажуваат прегледи дополнително.

„Се планира за време на паузата околу 10,30 часот лекарите да излезат во дворот на клиниките за да го изразат своето незадоволство. Ќе штрајкуваме се' додека не се договориме со министерот“, додаде д-р Ставриќ.

На штрајкот на лекарите од клиниките ќе им се придружат и лекарите од Градската општа болница „8 Септември“, додека засега нема најава од Градската хируршка клиника „Св. Климент Охридски“. Поддршка на скопските лекари најавиле нивните колеги од општите и клиничките болници од Тетово, Штип, Кочани, Битола, Прилеп, Охрид, Струга, Гевгелија. Според податоците на клиничкиот синдикат за штрајк се потпишале 1.320 лекари специјалисти.