08.11.2012, 15:14 Ултрадесничарите до Самарас: Имате ли договор со Скопје?
Атина - Десничарската партија Независни Грци ни во најкритичните моменти не се откажува од екстремните ставови околу спорот за името. Пред гласањето за новиот пакет-мерки од кои зависи финансиската иднина на Грција, лидерот Панос Каменос повторно побара од премиерот Адонис Самарас да одговори што планира да прави за спорот за името. Каменос пред неколку недели упати директно прашање до Самарас дали навистина се согласува терминот Македонија да фигирура во компромисното име. „Го прашувам премиерот, кој ја урна владата во1993 година затоа што не прифаќаше терминот Македонија да постои во ��мето на ФИРОМ. Сте направиле договор или планирате да направите договор со кој ќе го му отстапите терминот Македонија на Скопје? Да или не?“, извикуваше Каменос. Според него, веќе неколкупати побарале одговор од Самарас и од шефот на дипломатијата, Димитрис Аврамопулос, за ова прашање откако излегоа со ставот дека грчката влада останува на познатите црвени линии - име со географска одредница за севкупна употреба. Оние што го следат спорот за името во Грција го проценуваат ваквото однесување на Каменос како индикатор какви проблеми може да и' направат на грчката влада ултрадесничарските партии Независни Грци и Златна зора ако во парламентот се иницира и прашањето за името.
Инаку, македонскиот одговор на грчкиот меморандум за соработка се' уште е во сенка на расправиите за пакетот на мерки. Утре во официјална посета на Атина пристигнува српскиот претседател Томислав Николиќ, кој ќе има средба со претседателот Каролос Папуљас, а се очекува да ги посети и манастирите на Света Гора. Грција, по посетата на Николиќ на Скопје, изрази револт од неговите изјави со кои покажа разбирање и поддршка за Македонија во спорот за името. Изјавите кои во Грција беа прочитани како атака на Грција, според грчкото Министерство за надворешни работи, не биле во согласност со традиционалните добри врски што постојат меѓу Србија и Грција. (М.П.)
|
