„Телеком“ и „Т-мобиле“ со профит од 30,6 милиони евра во третиот квартал

„Македонски телеком“ и „Т-мобиле“ само во третиот квартал од годинава оствариле нето-профит од 30,6 милиони евра, додека за првите девет месеци од годинава групацијата прикажува добивка од близу 59,3 милиони евра.

„Македонски телеком“ и „Т-мобиле“ ја задржале водечката позиција на пазарот и во третиот квартал од годинава, покажуваат консолидираните финансиски резултати на компаниите. Во овој период тие бележат пораст на ИПТВ-корисници и зголемен број на ДСЛ-корисници. Приходите од интернет и дигитална телевизија преку интернет-протоколот (ИПТВ) се зголемени за 3 отсто во споредба со третиот квартал од минатата година. Фокусот на дабл и трипл плеј-пакетите резултирал со зголемен број ДСЛ-корисници за 6,1 проценти, со што до крајот на септември годинава имале 167 илјади корисници. Забележителен е и пораст на ИПТВ-корисниците, со тоа што на крајот на септември имале 58 илјади, што е зголемување за 63,9 проценти во споредба со септември минатата година.

„Нето-добивката за третиот квартал од годинава на ниво на групација е зголемена за 21,9 проценти во споредба со минатата година, како резултат на зголемените останати оперативни приходи и расходи поради трансакцијата за купопродажба на недвижности со размена, што резултирало со нето-добивка од 1,88 милијарди денари за кварталот (или 30,6 милиони евра) и нето-добивка од 3,65 милијарди денари за првите девет месеци од 2012 година (или 59,3 милиони евра)“, соопштуваат од компанијата. Приходите од говорните услуги во фиксниот сегмент се намалени за 7,6 проценти во споредба со истиот квартал лани, но со 294 илјади корисници, како што информира „Македонски телеком“, се' уште ја имаат водечката позиција. Намалување на приходите е забележано и кај мобилната телефонија, но и тука со 1.227 илјади корисници „Т-мобиле“ останува лидер на пазарот.

„Голем успех е да останеш лидер на пазарот во висококонкурентна средина, со постојан пад на цените, а да го задржиш квалитетот на услугата, а нашиот план е токму тоа“, изјави Даниел Сас, главен извршен директор на „Македонски телеком“ и претседател на Одборот на директори на „Т-мобиле“. Жарко Луковски, главен извршен директор на „Т-мобиле“, продолжува со фокусот за развој на мобилниот интернет и проширување на портфолиото на паметни телефони, како и нови бизнис-платформи. (Ек.Р.)