Затворен режисерот на антиисламистичкиот филм

Ќе одговара за измама и за непочитување условна казна

Американецот кој стои за антимуслиманскиот филм што доведе до масовни протести на Блискиот Исток е осуден на една година затвор поради непочитување условна казна. Накоула Бесили Накоула беше осуден од судија во Калифорнија откако ги призна четирите непочитувања на условната слобода кои потекнуваат од пресуда од 2010 година за измама. Ниту едно од обвиненијата не се поврзува со содржината на контроверзниот филм „Невиноста на муслиманите“. Десетици лица ги загубија животите на Блискиот Исток во протестите поради филмот.

Американскиот окружен судија Кристина Снајдер изјави дека Накоула (55) мора да помине 12 месеци во затвор поради непочитување на четиригодишната условна казна. Обвинителството бараше двегодишна затворска казна. По пресудата во 2010 година, Накоула издржа поголем дел од 21-месечната затворска казна за користење повеќе лажни имиња и отворање на околу 60 банкарски сметки за да спроведе шема со лажни чекови, наведоа од обвинителството.

„Лос Анџелес тајмс“ објави дека тој додека бил во затвор, го прочитал Куранот и барал начини да го критикува исламот. При неговото условно ослободување му било забрането да користи компјутери или интернет во следните пет години без одобрение од неговиот службеник одговорен за условно казнети лица.

Накоула, кој беше уапсен во септември, исто така, се претставувал и со името Сем Басил, Никола Басили и Марк Бесили Јусеф и се верува дека е Американец со египетско потекло, коптски христијанин. Американските власти соопштија дека веруваат оти Накоула е личноста која стои зад контроверзниот филм, но не кажаа дали тој е личноста што го пушти на интернет.

Муслиманите низ светот излегоа на улиците во знак на протест, бесни поради описот на пророкот Мухамед во филмот. (Би-Би-Си)