07.11.2012, 15:40 Нови правила за барателите на азил
Над 200 Авганистанци, Сомалијци, Палестинци, Пакистанци чекаат на одлуката дали ќе станат македонски државјани
Дополнителни права, но и обврски за барателите на азил во земјава предвидуваат измените во предлог-законот за изменување и дополнување на законот за азил, кој го изготви Министерството за внатрешни работи. Документот деновиве влезе и во собраниска процедура.
Според помошник-министерот за информирање во МВР, Иво Котевски, со измените, всушност, се усогласува досегашната регулатива со законодавството на ЕУ. „Овие измени ниту ги зајакнуваат ниту ги олабавуваат критериумите за доб��вање азил во земјава“, вели Котевски.
Така со новите измени, од една страна, им се даваат одредени права на барателите на азил (како право на образование, здравствена заштита, како и право на бесплатна правна помош), а од друга страна, им се наметнуваат и обврски кои тие ќе мора да ги испочитуваат за да останат во земјава.
„Барањето за азил ќе биде отфрлено доколку апликантот не се појави на некое од сослушувањата, но и во случај да не покаже примерно однесување“, вели Котевски. Досега се случуваше азилантите кои се сместени во Прифатниот центар во Визбегово често да го напуштаа Центарот без да ги информираат надлежните за тоа. Во иднина, поради тоа би можело да им биде повлечено барањето за азил.
Според надлежните, над 80 мажи и жени, како и 20-ина во Прифатниот центар во Визбегово ја очекуваат одлуката дали ќе станат македонски државјани. Од почетокот на годинава се регистрирани дури 200 нови баратели на азил, кои најчесто се од Авганистан, Сомалија, Палестина, Еритреја, Пакистан, Палестина, Бангладеш, Сирија, Коморски Острови.. .
Ерменци, Суданци, Египќани и Нигеријци, но и илегалци од Шри Ланка, Тунис и Марокот во изминативе години поминале низ прифатните центри во земјава. Од кога е отворен Прифатниот центар во Визбегово, досега во него биле сместени 1.330 азиланти. (Д.Т.)
|
