Изгласан новиот пакет мерки за Грција

Третиот пакет мерки за штедење беше усвоен со минимално мнозинство, при што од 299 пратеници само 153 гласаа „за“, 128 „против“, а воздржани беа 18 пратеници

Од нашиот дописник
Миркица Поповиќ

Атина - Грчкото собрание со минимално мнозинство го изгласа третиот пакет мерки за штедење. Од 299 пратеници само 153 гласаа „за“, 128 „против“, а воздржани беа 18 пратеници. Новиот пакет мерки вклучува кратење на бонусите за празници и летниот одмор за државните службеници и пензионерите, кратење на бонуси за оние во брак, намалување на пензиите, поскапување на струјата и цигарите, поскапување на одредени даноци, пократки отказни рокови и ред други.

Поради партиска непослушност и гласање против или воздржано, владеачката десничарска партија Нова демократија исклучи еден пратеник, а коалицискиот партнер ПАСОК шест пратеници од пратеничката група. Со ова исклучување на толку членови првичните проценки се дека од следната недела треба да се очекуваат внатрешни проблеми и превирања кои значително може да ја изменат сегашната слика за социјалистичката ПАСОК.

Според првичните шпекулации веќе почнува да се подготвува теренот за мини владина реконструкција. Информациите укажуваат на тоа дека доколку дојде до реконструкција во новата влада многу поактивни министерски и вице-премиерски улоги ќе имаат коалициските партнери на Нова демократија, ПАСОК и Демократска левица кои сега маргинално учествуваат во владиниот состав.

Премиерот Адонис Самарас задоволно истакна дека со тоа што поминаа мерките Грција го направила првиот важен чекор за нејзината финансиска иднина, за која во понеделник ќе заседаваат и министрите за финансии на ЕУ. Неговиот поглед останува завртен прво кон недела кога ќе се гласа буџетот за 2013, а потоа и кон одлуките на ЕУ.

Гласањето на мерките помина по огромна бура од дожд и граѓански револт против мерките, со центарот на Атина да наликува на воено поле. Неколку часа пред почетокот на гласањето илјадници граѓани ги преплавија улиците во центарот и демонстрираа пред собранието против новото стегање на грчкиот ремен, кое уште посилно ќе удри по празниот џеб на просечниот Грк. Протестите ескалираа рано вечерта со судир на група маскирани момчиња со полицијата. Околу собранието дојде до борба гради во гради, размена на молотови коктели, парчиња мермер, а полицијата за да ги разбрка демонстрантите за прв пат употреби водени топови наместо солзавец. Немирите завршија со околу 50 приведени граѓани.