Проширувањето на ЕУ нема да запре

Процесот на проширување на Европската унија не е во прашање и продолжува со полна пареа. Ова денеска го потенцираше Петер Стано, портпарол на еврокомесарот за проширување на ЕУ Штефан Филе по се` поголемиот број изјави на европски политичари дека со приемот на Хрватска идната година, вратите на Унијата ќе бидат затворени за нови членки до 2020 година.

- Апсолутно нема прашање за стопирање на процесот на проширување. Ова е една од клучните политики на ЕУ и една од најуспешните што дава резултати и што ја дефинира Унијата. Само ќе потсетам дека пред неколку недели, кога Комитетот за доделување на Нобеловата награда одлучи награда��а за мир да и ја даде на ЕУ, го посочи токму проширувањето како една од причините. Ние имаме јасна стратегија и истата минатиот месец ја преставивме во прогрес-извештаите за голем број земји, истакна Стано.

Гласноговорникот на Филе додаде дека проширувањето се одвива, но дека кога станува збор за временски рокови, тоа Комисјиата не сака да го коментира оти времето и датумите се во рацете на земјите-кандидати за членство и земјите во процес на пристапување.

- Во секој случај, имаме неколку земји во процес на пристапување, неколку земји-кандидати и некои што аспирираат да добијат кандидатски статус. Тоа значи дека овој процес и тоа како продолжува и нема прашање дека процесот на проширување на ЕУ е стопиран. Тоа не се случува ниту сега, ниту ќе се случи во иднина, дециден е Стано.

Инаку, токму германските политичари се најгласни во изјавите дека ЕУ е заморена од проширувањето, па дури бараат одложување на веќе договорениот прием на Хрватска. Од тие причини, еврокомесарот за проширување Филе утре ќе престојува во еднодневна посета на Берлин, Германија, каде што со властите на најсилната држава-членка на Унијата ќе разговара во врска со зачестените изјави дека веќе не го поддржуваат процесот на проширување на ЕУ. Тој има закажано средба со министерот за надворешни рбаоти Гвидо Вестервеле, а ќе има средби и со лидерите на политичките партии во германскиот Бундестаг.

Од кабинетот на Филе ни потврдија дека главна цел на комесарот е да разговара за иницијативата на Германија да се одложи приемот на Хрватска во ЕУ, закажан за 1 јули 2013 година, што тие го оправдуваат со неисполнувањето на одреден број на реформи. Исто така, еврокомесарот Филе, како што ни потврдија од неговиот кабинет, ќе се обиде да ги убеди Германците да го поддржат приемот на нови членки во ЕУ, посебно на земјите од Југоисточна Европа, меѓу кои е и Македонија. (МИА)