„Македонски лекарственици од 19 век“ од Михајло Георгиевски

Книгата содржи околу 800 рецепти кои луѓето во Македонија ги користеле пред два века за излекување од разни болести

Околу 800 рецепти кои луѓето во Македонија ги користеле пред два века за излекување од разни болести содржи неодамна објавената книга „Македонски лекарственици од 19 век“ на Михајло Георгиевски.

Рецептите се од седум зачувани ракописни книги т.н. лекарственици, напишани на македонски народен јазик. Во нив е објаснето како да се направи лек за одредена болест. Покрај лекови од народната медицина, за кои се употребуваат тревки (чаеви, билки, плодови и корени од растенија...) или други состојки (масла, алкохол, афионски катран, темјан, мед, сумпор...), има и лекови кои се приготвуваат со суеверие - делови од животни и со кажување молитва.

Лекарствениците содржат рецепти за болни и изнемоштени, за срце, очи, за разновидни главоболки (пр. од менување на умот), за лекување заразни болести, но и против душевни болки уплав, сафра, дерт, несоница...

Најобемниот ракописен лекарственик во Македонија е Зборникот на народни лекови од 19 век. Содржи 140 рецепти и се чува во Историскиот архив во Велес.

Лекарствениците нудат богат материјал за стручна анализа во алтернативната и фармацевтската медицина. Интересни се и зашто откриваат како се лекувале луѓето пред 200 години, а народниот јазик на кој се напишани е корисен и за проучување на македонските дијалекти.

Д-р Михајло Георгиевски ја истражува 40 години духовната културна историја на Македонија. Работел во Институтот за старословенска култура и во НУБ „Св. Климент Охридски“. Автор е на над 20 книги, а издавач на најновата, „Македонски лекарственици од 19 век“, е „2 Август С“ од Штип.