Државата сака да гради аеродром среде Охридско Езеро

Идејата е аеродромот да се гради по пат на концесија или со помош на приватен партнер за што се бараат заинтересирани инвеститори

БИЛЈАНА АНГЕЛОВСКА


На Охридско Езеро ќе се гради аеродром на вода. Државата го опипува пулсот дали има заинтересирани странски и домашни инвеститори кои би влегле во реализација на еден таков проект во градот заштитен од УНЕСКО. Аеродромот би се градел по пат на концесија или со помош на приватен партнер.

Министерството за транспорт и врски вчера објави барање за изразување интерес за учество во меѓународен повик за изградба на нов аеродром на вода на Охридско Езеро. Предвидено е во рамките на целокупниот проект да биде вклучено финансирање, проектирање, изградба, оперирање и одржување на новиот аеродром. Владата, како што се вели во соопштението на Министерството, преку постапка за доделување концесија или договор за воспоставување јавно приватно партнерство ќе избере приватен партнер или концесионер од приватниот или од јавниот сектор, кој ќе биде одговорен за имплементација и реализирање на проектот.

Сите заинтересирани субјекти треба до 10 декември оваа година да достават изјава за интерес со краток опис на активностите на компанијата и копии од оперативните и финансиските извештаи од последните три деловни години.

Во објавеното меѓународно јавно барање е истакнато дека Охридско Езеро и Охрид се прогласени за светско наследство на УНЕСКО и претставуваат најпосетени туристички места во Македонија. Притоа се потенцира дека со изградбата на аеродромот на вода ќе се овозможи подобра поврзаност на Охридско Езеро и Охрид со преостанатите туристички дестинации на Балканскиот Полуостров. Барањето е објавено во домашните и меѓународни печатени медиуми и на интернет-страницата на Министерството за транспорт и врски.

Надлежните очекуваат дека изградбата на аеродром на вода дополнително ќе го зголеми бројот на туристите кои доаѓаат во Охрид, бидејќи ќе им овозможи да патуваат од едно туристичко место до друго. Сепак, од Министерството за транспорт и врски не добивме подетални информации околу тоа на кој потег од езерото точно се предвидува да се гради аеродромот, со какви димензии ќе биде, какви придобивки ќе има државата, на колку години би била доделена концесијата и каков би бил партнерскиот однос со евентуалниот приватен партнер. Исто така, останува нејасно и какви последици ќе има аеродромот врз природната средина и на Охридско Езеро, но и на пошироката околина.

Од намерата на државата се најдоа затекнати и охриѓани. Особено се загрижени екологистите кои се убедени дека евентуален аеродром на вода дополнително ќе го загади езерото и целосно ќе го наруши биодиверзитетот.

„Ова е гром од ведро небо за нас. Ние како екологисти во сите наши и домашни и меѓународни учества на разни трибини постојано сме потенцирале дека покрај колекторот, Охридско Езеро се соочува и со друг проблем, а тоа се пловните објекти. Затоа и сме барале да се забрани употреба на пловни објекти со течни горива, како што е на Женевско Езеро. А, сега излезе ова со аеродром на вода. Не сакаме ни да размислуваме за таква можност, но доколку идејата упорно се турка, сигурно ќе преземеме нешто конкретно. Верувам дека зад нас ќе застанат и охриѓани, но и сите други граѓани, бидејќи Охридско Езеро не е само на охриѓани“, вели Борис Стојаноски, претседател на еколошкото друштво „Грашница“ од Охрид.

Тој е категоричен дека не смее да се дозволи да се развива туризмот на сметка на се' друго што е поврзано со заштитеното природно богатство на Охридско Езеро. Како пример ја посочува охридската пастрмка, која во последниве години се' повеќе ја снемува не само поради загаденоста на езерската вода, туку и поради бучавата од моторите од пловните објекти.