Промовирана „Македонскиот 19 век“ на Горан Калоѓера

Калоѓера, кој е и почесен конзул на Македонија во Хрватска и раководител на Катедрата за македонски јазик при Универзитетот во Риека, во Велес допатува да го добие највисокото општинско признание на градот, наградата „9 Ноември“

Во Велес беше промовирана најновата книга на академик Горан Калоѓера „Македонскиот 19 век“. Тој е најзначајното македонистичко име од областа на литературата надвор од земјава, автор на 30 дела, од кои половината се поврзани со Македонија. Во оваа книга низ четири поглавја Калоѓера ја проучува културата и литературата во 19 век во Мак��донија.

„За да се напише оваа книга треба да се биде искусен автор, храбар човек и зналец, бидејќи 19 век е најпротивречниот период на македонската опстојба. Згора на тоа, ова дело го пишува човек припадник на друг народ, друга култура и друга јазична средина. Оваа книга е ретка и несекојдневна, бидејќи по својот концепт е вистинска историја на македонскиот 19 век“, изјави академик Васил Тоциновски, промотор на книгата. Книгата ја издаде Друштвото на Македонците во Република Хрватска, со финансиска поддршка од хрватската влада. На 250 страници Калоѓера пишува за школството, за јазичното прашање, за печатниците, библиотеките, читалниците, музичкиот живот, за 20-ина автори, меѓу кои се и браќата Миладиновци, Григор Прличев, Јордан Хаџи Константинов Џинот, Рајко Жинзифов, Крсте Петков Мисирков, Кузман Шапкарев, Партениј Зографски, браќата Петковиќи.

„Во Македонија, за жал, недоволно храбро се проучуваат и се вреднуваат книжевните автори од 19 век. Сите значајни работи што се случиле подоцна водат корени токму од овој период. Токму затоа треба да се каже дека луѓето кои работеле, пишувале во 19 век, не биле полуписмени, безначајни учители, туку врвни интелектуалци на своето време. Тогаш, исто како што француските, англиските и руските автори пишувале патописи, новели, романи, истите тие форми биле реализирани и од македонските автори во 19 век. За вистина, не на македонски литературен јазик, кој подоцна бил нормиран, но на говорот што бил користен во Македонија“, рече Горан Калоѓера. Тој е и почесен конзул на Република Македонија во Хрватска и раководител на Катедрата за македонски јазик при Универзитетот во Риека. Добитник е и на Почесното Рациново признание за ширење на македонската култура и литература надвор од границите на земјата. Во Велес допатува да го добие највисокото општинско признание на Велес, наградата „9 Ноември“. (П.П.)