Филмот „Трето полувреме“ прикажан во Њујорк

Проекцијата, која воедно беше и хуманитарен настан за собирање помош за жртвите на ураганот „Сенди“, ја отвори д-р Срѓан Керим, кој за филмот рече дека е потсетник на потребата да се бориме против злото во луѓето

.Филмот „Трето полувреме“ на режисерот Дарко Митревски, македонскиот кандидат за номинација за „Оскар“, во саботата вечерта беше премиерно прикажан во Њујорк. Проекцијата, која наедно беше и хуманитарен настан за собирање помош за жртвите на ураганот „Сенди“, ја отвори д-р Срѓан Керим, кој за филмот рече дека е потсетник на потребата да се бориме против з��ото во луѓето. Филмот беше прикажан пред стотина уметници, дипломати и други гости во киносалата на „Трибека гранд хотел“, во центарот на Њујорк во која се одржува познатиот „Трибека филмски фестивал“. Меѓу гостите беа и познатиот македонски научник Горазд Росоклија, амбасадорот на Македонија во ОН, Пајо Авировиќ, и конзулот Звонко Муцунски, директорот на Дирекцијата на технолошко-индустриски развојни зони, Виктор Мизо, актери, луѓе од актерскиот, но и од манекенскиот свет.

„Идејата на Дарко да ја претстави борбата на злото, меѓу најлошиот дел од човечката психа, за едно од најмонструозните злосторства кога било извршени, и љубовта, во рамките на љубовна приказна, е многу интересна. Идејата му е да ја прикаже оваа постојана борба меѓу доброто и злото, за добрата волја, силната волја, љубовта и чувствата да надвладеат на крајот на денот. Тоа е пораката. Но, оваа порака има универзален карактер, бидејќи мораме да бидеме свесни дека злото е секогаш околу нас, со нас и во нас. Како да го спречиме, да го победиме, тоа е прашањето. Сигурен сум дека заедно со мене ќе видиме еден од можните начини за тоа. Тоа е големиот придонес на еден храбар режисер и одличниот тим што тој го собра. Ќе видите дека ние, од Македонија, придонесуваме кон тоа, на јазик што секој од нас може да го разбере“, рече на отворањето д-р Срѓан Керим, кој во обраќањето потсети дека Њујорк неодамна беше посетен од непоканетиот гостин, ураганот наречен „Сенди“.

„Како и сите непоканети гости, таа беше непредвидлива и многу тешка, и предизвика големи штети. По 11 септември, тоа беше нова катастрофа за Њујорк, и траума за сите нас. Луѓето велат дека ураганите се природни катастрофи, но јас не го делам тоа мислење. Сметам дека ’Сенди‘ е зло кое е создадено од човекот. Колку помалку се грижиме за климатските промени, толку повеќе последици ќе има врз нас. Ова е типичен пример како глобалното затоплување влијае врз нашата планета. Тоа беше мој приоритет во Генералното собрание на ОН и така и ќе остане. Ве повикувам да бидеме сојузници, да работиме со сите наши сили да ја зачуваме нашата планета“, потенцираше Керим.

„Оваа е само една од низата проекции што ги организираме додека тече оскаровската кампања за овој филм. Убаво е да се биде тука, најубаво е да си провериш дали емоциите кои функционираат пред домашната публика работат и пред странската публика. Ова е трета американска проекција и ми дава за право да заклучам дека не само што реагираат туку реагираат и погласно. Сето тоа што ’Трето полувреме‘ сака да го пренесе како порака и да го раскаже допира до овие луѓе“, изјави режисерот Дарко Митревски, кој додаде дека следниот чекор за филмот е промоција во киносалите низ Соединетите Американски Држави. Митревски, кој на крајот на проекцијата беше награден со бурен аплауз, објасни како дошол до идејата за „Трето полувреме“, работејќи на документарна серија за македонскиот фудбал.

Пред гледачите, тој зборуваше за својата средба со Нета Коен, врз која е заснован ликот на Ребека Коен од филмот. Истакна дека филмот бил направен во соработка со фондацијата „Шоа“, основана од Стивен Спилберг, која собира видеозаписи од жртвите на холокаустот, меѓу кои снимиле разговор и со Нета Коен.

„Поминав два часа во нејзиниот дом и Нета Коен ми ја раскажа својата приказна. Како се заљубила во сиромашен христијанин - фудбалер, како татко и' не ја одобрил нејзината љубов и како побегнала со него. Семејството се откажало од неа, што на крајот и' го спасило и животот, бидејќи не била на списоците за депортација. На крајот ми покажа црно-бели фотографии, браќата, сестрите, роднините, сите исчезнати во гасните комори во Треблинка. Тоа беше многу емотивна средба. Нета плачеше, ги гушкаше сликите. Единствената фотографија во боја што ми ја покажа беше од нејзините синови, внуци, снаите, големо семејство и се сврти да каже - погледнете што направив, преку мене, мојата крвна рода се спаси“, раскажа режисерот.

Ѕвездата на вечерта, манекенката и актерка во филмот Катарина Ивановска, која ја толкува улогата на Ребека Коен, пак, посочи дека филмот го гледала повеќепати.

„Ова е петти пат и немам толку трема, но имаше многу публика, мои пријатели и се плашев како ќе реагираат. Но, на крај си заминаа со насмевка и мислам дека им се допадна многу филмот“, рече таа по проекцијата.