08.11.2012, 15:33 Фестивалот „Синедејс“ ќе понуди 107 филмови
Отворањето на Фестивалот на европски филм е на 15 ноември со словенечкиот филм „Шангај“
Под мотото „Да ја исплакнеме сапуницата од себе, помалку сапун, повеќе филм“ годинешниот Фестивал на европски филм „Синедејс“ ќе понуди 107 филмски наслови. Фестивалот ќе се одржи од 15-ти до 25 ноември во киносалите „Милениум“, „Фросина“ и во Кинотеката на Македонија.
Во официјалната програма годинава се вклучени десет млади европски автори. Регионалната програма „Синебалкан“ќе понуди седум филма, а ова издание воведува и програма на европски филмови во кои учествуваат македонски филмски работници насловена МКиЕУ, во која има пет наслови. За оваа година организаторот МКЦ ќе понуди и 40 гала премиери за 40 години од постоењето на Младинскиот културен центар, а во чии рамки ќе можат да се видат новите остварувања на: Копола, Ханеке, Бертолучи, Кроненберг.
Отворањето на фестивалот е планирано за 15 ноември со премиерата на словенечкиот филм „Шангај“ на Марко Наберсник, во кој игра Висар Вишка. А за првиот ден е резервирана и премиерата на филмот на Иштван Сабо „Врата“ со Хелен Мирен и Мартина Гедек во главните улоги.
Во програмата „Земја во фокусот“ оваа година е кинематографијата на Египет, а во нејзини рамки ќе бидат прикажани документарни филмови за Арапската пролет. Селектор на оваа програма е Шериф Авад, филмски уредник на списанието Egypt Today, кој е и член на жирито за главната конкуренција. Членови на жирито се и: македонскиот режисер Вардан Тозија и Јан Харлан, познат како продуцент на филмовите на Стенли Кјубрик. Харлан се очекува да пристигне во Македонија, а меѓу останатите гости се и познатиот германски режисер Андреас Дресен, потоа српскиот режисер Горан Паскалјевиќ, со чиј филм „Кога ќе се раздени“ ќе се затвори фестивалот, како и младата авторка Маја Милош, чиј „Клип“ крена голема прашина.
„Синедејс“ ќе има и неколку музички документарци, кратки филмови од македонската продукција, првпат и поетски филмови, како и неколку придружни настани. Буџетот за фестивалот е околу 1,5 милион денари обезбедени од Град Скопје, Министерството за култура и Делегацијата на ЕУ во Скопје. Влезниците за сите проекции ќе бидат 100 денари. (К.Р.)
|
